ప్రచారమా... మజాకా?

'నమస్కారం గురూగారూ!' 

'ఏంట్రోయ్‌! ధగధగలాడిపోతున్నావ్‌? ఇస్త్రీచేసిన ఖద్దరు చొక్కా వేశావ్‌. మొహాన పౌడర్‌ దట్టించావ్‌. మూతి కొసలు చెవులకు అంటుకునేలా నవ్వేస్తున్నావ్‌. ఏంటి సంగతి?' 

'మీకు తెలియనిదేముంది గురూగారూ! ఎన్నికల్లో నిలబడ్డా కదండీ? ప్రచారానికి ఏమైనా కిటుకులు చెబుతారేమోనని వచ్చానండి' 

'రాక రాక నా దగ్గరికే వచ్చావా? కానీ, నా సలహాలు నీకంతగా నచ్చవేమోరా!' 

'అమ్మమ్మ ఎంతమాట. తమరు రాజకీయ దురంధరులు. రాజకీయాలను కాచి వడపోసినవారు'

'ఆపరా ఆపు. కాచి వడపోసి కాఫీలా తాగేశాననలేదు. రాజకీయాలకు తొలిమెట్టయిన పొగడ్తలు బాగానే ఒంటపట్టాయి కానీ, అవన్నీ నా దగ్గర ప్రయోగించకు. సరే, అడిగావు కాబట్టి చెబుతున్నా వినుకో. ముందా చొక్కా తీసి, నలిపేసి, మళ్ళీ వేసుకో. దట్టించి కొట్టిన ఆ పౌడర్‌ తుడిచేసుకుని ఇన్ని నీళ్లచుక్కలు మొహాన కొట్టుకో. ఆ నవ్వులాపేసి, సాధ్యమైనంత ఏడుపు మొహం పెట్టుకో!' 

'అదేంటి గురూగారూ! అలా చెప్పారు?' 

'కాదేంట్రా మరి? చక్కగా ఇస్త్రీచేసిన వెయ్యి రూపాయల నోటులాగా ప్రజల దగ్గరికి వెళ్లావనుకో... ఏమనుకుంటారు? కిందటిసారి మనం ఓటేశాక మనిషిలో చాలా మార్పొచ్చిందీ, ఆడిమటుకు ఆడు సుఖాలు అనుభవించేత్తన్నాడూ, మన బతుకులు మాత్రం ఇట్టాగే పడి ఏడుస్తున్నాయీ అనుకోరా?'

'ఓహోహో, అర్థమైందండీ మీ మాటల్లో మర్మం. కానీ, నవ్వితే తప్పేంటండీ?' 

'మరి కాదా! ప్రజానీకం పుట్టెడు బాధల్లో ఉంటే- నీకు నవ్వెలా వస్తుందిరా? వాళ్ల బాధలు చూసి, కష్టాలు విని, మనసంతా తల్లిడిల్లిపోతున్నట్టు, ఇప్పటిదాకా ఏడ్చి ఏడ్చి ఇక తప్పక కళ్లు తుడుచుకుని ప్రచారానికి చక్కా వచ్చినట్టు, ప్రజలకు సేవచేసే అవకాశాన్ని మరోసారి ఇవ్వకపోతే ఇప్పటికిప్పుడే గుండె పగిలి ప్రాణం పోయేట్టు... నీ వాలకం కనిపించాలిరా! వాళ్లని ఓదారుస్తూ, నువ్వూ ఓదార్పు పొందుతున్నట్టు ఆకట్టుకోవాల్రా. రాజకీయాల్లోకి రాగానే సరిపోదురా, కిటుకులు లేకపోతే చుట్టూ ఉన్నవాళ్లని చూసి నేర్చుకో!'

'ఇంతలా నేర్చుకోవడానికి ఎవరున్నారండీ?' 

'నామినేషన్‌ వేసిన ఉత్సాహంలో బుర్ర మసకేసిపోయిందేంట్రా? రాష్ట్రంలో సుడిగాలిలా తిరిగేస్తున్న యువనేతను మర్చిపోయావా? దొరికిందే ఛాన్సుగా తండ్రి అధికారాన్ని అడ్డంపెట్టుకుని భూములు, గనులు ఎవరెవరికో ధారాదత్తం చేయించి, ఆ లోపాయికారీ లావాదేవీల సాక్షిగా కోట్లు కొల్లగట్టి, కోటలు కట్టి కూడా జనం కోసం జావగారిపోతున్నట్టు, వాళ్ల కోసమే బతుకీడుస్తున్నట్టు, మనసేడుస్తున్నట్టు, తనువంతా తపించిపోతున్నట్టు కనిపించడంలే? అద్దిరా ప్రజల ముందుకెళ్లే జోరూ ఓట్లడిగే తీరూను. నేర్చుకోండ్రా... ఎప్పుడు బాగుపడతార్రా?'

'గురూగారూ! కోప్పడకండి. మీరు చెప్పినట్టే వేషం, భాష, హావభావాలూ మార్చేస్తా. ఇంకా ఏం చేయాలో కాస్త చెబుదురూ?' 

'నేను చెప్పడం కాదురా, నీ చేతే చెప్పిస్తా. ఉదాహరణకి నువ్వు ప్రచారంలో భాగంగా ఓ గుడిసెలోకి వెళ్లావనుకో. అక్కడొక ముసిలోడు సీవెండి బొచ్చెలో బువ్వ తింటున్నాడనుకో. అప్పుడేం చేస్తావు?'

'ఏముందండీ? ఆడు అన్నం తినేదాకా బయట అరుగుమీద చతికిలబడి, చేయి కడుక్కోవడానికి బయటకొచ్చినప్పుడు నమస్కారం చేసి ఓటడుగుతానండి' 

'మరదే, ఇవన్నీ ఎప్పటివో పాత పద్ధతులు. ఇప్పుడు కొత్త తరహాలొచ్చేశాయి. మొన్న పేపర్లో చదవలే? నువ్వు చటుక్కున చొరవ తీసుకుని గుడిసెలోకి జొరబడిపోయి ఆడు తింటున్న సీవెండి బొచ్చె చనువుగా తీసేసుకుని లోపలున్న కలో గంజో, అన్నం మెతుకులో తీసి ప్రేమగా నోట్లో పెట్టేయాలి. ఆడు ఆశ్చర్యపోయి నోరెళ్లబెడితే పక్కనున్న ఏ ఆవకాయ పిండో నంజుకో అన్నట్టు నాలిక్కి రాసేయాలి. ఆడికి పొలమారితే చటుక్కున బుర్రమీద తట్టి, గ్లాసులో నీళ్లు తీసి పట్టించేయాలి. ఈ పన్లన్నీ చేస్తూనే... 'ఈసారి గనక నాకే ఓటేస్తే ఇంతకంటే చాలా చేస్తా'నని చెప్పి ఒప్పించేయాలి. ఆడు తేరుకునేలోగా ముందుగానే ఏర్పాటు చేసుకున్న ఫొటోగ్రాఫరు క్లిక్కుమనిపించాడో లేదో చూసుకుని బయటకొచ్చేయాలి. తెలిసిందా?'

'అద్భుతం సార్‌! ఈ మాత్రం అందిస్తే ఇక ఆపై రెచ్చిపోతానండి. వీధి కుళాయి దగ్గర ఏ మహిళైనా నీళ్లు పట్టుకుంటుంటే చనువుగా వెళ్లి బిందె తీసి చంకకందిస్తానండి. ఇంకా వీలుంటే ఇంటి దాకా బిందె మోసుకెళ్లి దించి వస్తానండి. ఏ అక్కో ఎసట్లోకి బియ్యం తీసుకుని కనిపిస్తే చొరవగా వెళ్లి బెడ్డలేరుతానండి. ఏ తల్లయినా పిల్లాడికి మొహం కడుగుతూ కనిపిస్తే చటుక్కున నాలిక గీసేస్తానండి. ఏ పిల్లకో జడ వేస్తుంటే దువ్వెన తీసుకుని చిక్కులు తీసేస్తానండి...'

'వార్నీ! అల్లుకుపోవడంలో నీ తరవాతేరా. కానీ, జాగ్రత్తరేయ్‌. ఇక తరవాత ముఖ్యమైనవి హామీలురా. అవి సాధ్యమా, కాదా, వీలవుతాయా, లేదా అనే మీమాంసలు పక్కనపెట్టి ఎడాపెడా ఏది తోస్తే దాన్ని వాగెయ్యి. జనాల కాళ్లకి వేళ్లకి అడ్డంపడుతూ, ఇంటి వాకిట్లోనే ప్రభుత్వాన్ని నడిపేస్తానను, నీ సొమ్మేం పోయింది? ఎలాగోలా అధికారంలోకి రావడమే కదా నీ లక్ష్యం?'

'అవునండోయ్‌, ఇక చూస్కోండి ప్రచారంలో దున్నేస్తా'

'పోయిరా... శుభం!'

PUBLISHED IN EENADU ON 28.03.2014

టోకున టోపీ

'అయ్యా... కొంప మునిగిపోయింది. వార్త వినగానే సెలవు రద్దుచేసుకుని పరిగెత్తుకు వచ్చేశా. ఇప్పుడేం చేద్దామని సెలవు?'

'ఛ ఛ వూరుకో! అపశకునం మాటలు నువ్వూను. మన కొంప మునగడమేంటయ్యా?'

'అయ్యా... మనం కొంపలు ముంచేవాళ్లం, కూల్చేవాళ్లమని ఇన్నాళ్లూ తెగ సంబరపడిపోయేవాడినండి. ఇప్పుడు మన కొంపకే ఎసరు వచ్చినట్టుందని గాబరాగా ఉందండి'

'వూరికే నాన్చక విషయమేంటో చెప్పవయ్యా. ఏదో కొత్త సెక్రట్రీవి కదా, పనికింకా అలవాటు పడలేదని వూరుకుంటుంటే నన్నే కంగారు పెట్టేస్తున్నావు'

'అయ్యా... తమరిది నిబ్బరమో నిండా మునిగిన ధైర్యమో తెలియడం లేదండి. అమ్మో అమ్మో... ఒకటా రెండా- ఏకంగా ఎనిమిది వందల కోట్ల రూపాయల ఆస్తులు జప్తు చేయడమంటే మాటలేంటండి? ఈపాటికి తమరికి ఏ గుండెపోటో వచ్చేసుంటుందని, ఐసీయూలో చేరిపోయి ఉంటారని ఆదరాబాదరా పరిగెత్తుకు వస్తే, తమరేమో నిమ్మకు నీరెత్తినట్టు ఉన్నారు. నాకేమీ అర్థం కావడం లేదండయ్య!'

'వార్నీ, అదా నీ కంగారు? ముందు నిదానంగా కూర్చుని కాసిని మంచినీళ్లు తాగు. దుడుకు తగ్గాక దూకుడు పెంచుదువుగాని'

'ఏంటో, మీరెన్ని చెప్పినా మనసు కుదుటపడటం లేదండి. అన్నేసి వందల కోట్ల ఆస్తుల్ని జప్తు చేశారంటే... రేప్పొద్దున తమరి లావాదేవీలన్నీ ఏమవుతాయి? ఎలా తేరుకుంటాయనేదే దిగులండి'

'అదిగో మళ్ళీ గింగిరాలెత్తుతున్నావు. సర్లె, నువ్వు కొత్తోడివిలే కానీ- ఇది మనకొక లెక్క కాదయ్యా. మనం దిగమింగిన దాంట్లో ఇదెంత? సముద్రంలో కాకిరెట్టంత. గిన్నెడు పాయసంలో కిస్‌మిస్‌ పండంత. వందెకరాల జామ తోటలో ఓ లేత పిందంత. నీకో పట్టాన అర్థం కాదులే. అందుకే పనిలోకి చేరగానే మన చరిత్రంతా చదువుకోమని చెప్పింది. అదంతా తెలుసుకుని ఉంటే ఇంత గాబరా పడేవాడివి కాదు. ఇంకా నయం... నీకే గుండెపోటో వచ్చేసింది కాదు... వట్టి కంగారుగొడ్డులాగున్నావే?'

'అమ్మయ్య, ఇప్పటికి నా ప్రాణం కుదుట పడిందండి. నిజానికి తమరి చరిత్ర చదువుదామని పాత దస్త్రాలు తీశానండి. అమ్మో, ఎన్నెన్ని కుంభకోణాలు, ఎన్నెన్ని దారుణాలు, ఎన్నెన్ని అకృత్యాలు? అవన్నీ చదవాలంటే నా జీవితం సరిపోదనిపించిందండి. ఎలాగోలా ఉపోద్ఘాతాలైనా చదివి తమరి నిజస్వరూపాన్ని తెలుసుకోడానికి ప్రయత్నిస్తానండి. అయినా, నాకు తెలియక అడుగుతానండీ... అవడానికి ఇది పెద్ద దెబ్బే కదండి? ఇక తమరి పరువేం కాను, మరి ప్రజలకు మొహమెలా చూపిస్తారండీ? కాస్తయినా సిగ్గేయదూ?'

'హ హ హ్హ... పిచ్చోడా! ఆ సిగ్గు, పరువులాంటివి ఉండేడిస్తే అసలిలాంటి పనులు చేస్తామా చెప్పు? అవి వదిలేశాకే కదా, ఇవన్నీ మొదలెట్టింది? అయినా అట్టాంటివి మా ఇంటా వంటా లేవనుకో. అయినా ఇదీ మన మంచికేలే...'

'మంచికా, అదెలాగండి? ఏమిటో, మీరే కాదు, మీ మాటలూ ఓ పట్టాన మింగుడుపడటం లేదండి. ఆస్తులు జప్తుచేశారంటే, అక్రమాలు బయటపడ్డట్టే కదండీ, నిజాలు పట్టుబడ్డట్టే కదండీ? మరి ప్రజానీకానికి తమరి మీద నమ్మకం తగ్గిపోతుందేమోనని నా బెంగండి!'

'చూడు సెక్రట్రీ. జనం మీద నాకెలాంటి దిగులూ లేదయ్యా. వాళ్ల అమాయకత్వం మీద నాకంత నమ్మకం. వట్టి వెర్రిబాగులోళ్లనుకో. వాళ్ల కళ్లముందే మనం వెయ్యి రూపాయలు దోచేసుకుని జేబులో పెట్టేసుకున్నా, ఒక్క రూపాయి వాళ్ల మొహాన పడేస్తే సంబరపడిపోతారు. మొదట్నుంచీ మన సిద్ధాంతం అదే కదా? ఆ దార్లోనే మరి మనం ఎన్నో వేల కోట్ల రూపాయలు వెనకేశాం. చరిత్ర చదువుకో బాగుపడతావు'

'అవుననుకోండి. కానీ ఇలాంటి అవినీతి, అవకతవక, అకృత్య కార్యకలాపాల వల్ల మొత్తం వ్యవస్థ నాశనమైపోతుందని, చుట్టుతిరిగి ఈ అవినీతి వ్యవహారాలన్నీ కలిసి తమ జీవితాలనే అతలాకుతలం చేస్తాయని జనం తెలుసుకోలేరు... పాపం!'

'ఏందయ్యో, ప్రజానీకం మీద అంతేసి జాలి పడిపోతున్నావ్‌. జాగ్రత్త... ఆరోగ్యానికి అంత మంచిది కాదు. పది కాలాలపాటు పది కాసులు వెనకేసుకుంటూ అంతస్తు మీద అంతస్తులు పెంచుకోవాలంటే ఇట్టాంటి దరిద్రగొట్టు ఆలోచనల్ని దరి చేరనివ్వకూడదు. నాలాంటివాడి దగ్గర పనిచేయాలంటే నువ్వూ ఇవన్నీ నేర్చుకోవాలి మరి'

'సరేనండయ్య. కానీ, ఇప్పుడు ఆ జప్తు యవ్వారం నుంచి బయట పడేదెలాగో కాస్త చెబుదురూ'

'ఏముందయ్యా, మాటకు మాట అనడమే. మన జనాదరణ చూసి అధికార పార్టీకి దడ పట్టుకుందని, అందుకే ఇలా కక్షకట్టి సాధిస్తోందని, నోట్లో వేలు పెట్టినా కొరకడం రాని నాలాంటివాడిమీద లేనిపోని అభాండాలు వేసి కేసులపాలు చేస్తోందని వూదరగొట్టే ఏర్పాట్లు చూడు. వెర్రిజనం కాబోసనుకుని మన మీద సానుభూతి కురిపించేత్తారు. వారంతా కళ్లొత్తుకునేలా నమ్మించడానికి మన అనుచరవర్గాల్ని సభలెట్టి మైకుల్లో ఉపన్యాసాలు దంచమను. వూరూవాడా పోస్టర్లు అతికించి కరపత్రాలు పంచి నానా అల్లరీ చేయమను. అర్థమైందా?'

'ఆహా, అద్భుతం సార్‌! మీ సానుభూతి వేషాలు చూస్తుంటే రసానుభూతి కలుగుతోందండి. ఎవరైనా ఒకరికి ఒక టోపీ పెట్టగలరు. మీరు మాత్రం ప్రజలందరికీ ఒకే టోపీ వేయడంలో ఘనాఘనులు. తమరి దగ్గర పనిచేయడం నా పూర్వజన్మ సుకృతమంటే నమ్మండి'

'జాగ్రత్త... భక్తితో కళ్లుతిరిగేను. పడతావ్‌. పోయిరా!'

PUBLISHED IN EENADU ON 11/03/2014

మహా మాయగాళ్లు!

'అర్భక భద్ర' అవార్డుల ప్రదానోత్సవం...

ఓ హాలు ముందు పెద్ద పెద్ద అక్షరాలతో రాసిన ప్రచారపత్రం చూసి సామాన్యుడికి ఆసక్తి కలిగింది. ఉత్సాహంగా లోపలికి వెళ్లి కూర్చున్నాడు. వేదిక మీద ఒకాయన నల్లకోటు, నల్లటోపీ పెట్టుకుని అప్పుడే ఉపన్యాసం మొదలుపెట్టాడు.

'అందరికీ నమస్కారం. వీధుల్లో గారడీలు చేసేవారి నుంచి వేదికలపై మ్యాజిక్కులు చేసేవారి వరకు మా ఇంద్రజాలికులకు ఉన్న ప్రజాదరణ అందరికీ తెలిసిందే. రేపు ఇంద్రజాలికుల (మెజీషియన్ల) దినోత్సవం. మమ్మల్ని మించిన ఇంద్రజాల మహేంద్రజాలికులను సత్కరించుకోవాలనే సంకల్పం కలిగింది. వారు గారడీ, గజకర్ణ, గోకర్ణ, టక్కుటమార, ట్రిక్కుటెక్కుటెక్నిక్కుల హైటెక్కు విద్యల్లో ఆరితేరినవారు. వాళ్లందరికీ ఉచిత రీతిన బిరుదులిచ్చి గౌరవించాలనే ఈ సభ పెట్టాం...'

సామాన్యుడు తన పక్కనున్న వ్యక్తిని గోకి, 'ఇంతకూ ఎవరువాళ్లు?' అన్నాడు ఉత్కంఠతో.

'ఇంకెవరు, మన రాజకీయ నాయకులు' అన్నాడాయన.

'అదేంటి, వాళ్లు మ్యాజిక్కులు చేయడం ఏంటి?'

'భలేవాడివే. ప్రజల మనశ్శాంతిని, భద్రతలను, నిశ్చింతను, భవిష్యత్తుపై భరోసాను, ధీమాను, ధైర్యాన్ని ఉన్నపళంగా మాయం చేయడంలే? వాళ్లను మించిన మెజీషియన్లు ఎవరుంటారు?'

'నిజమే. మరి అర్భక భద్ర ఏంటి?'

'వీరి పాలనలో అర్భకుడు ఎప్పుడూ ఎదుగూబొదుగూ లేకుండా భద్రంగా ఉంటాడని...'

సామాన్యుడు సంబరంగా వేదికపైకి చూశాడు. అక్కడ ఉపన్యాసం కొనసాగుతోంది. '...నిత్య రాజకీయ సమస్యలతో సతమతమవుతున్న సామాన్యులకు ఒకింత వినోదం కలిగించడానికే ఈ ప్రయత్నం. మేం రాజకీయ నేతల స్వరూపాలను సూచనాత్మకంగా తెలిపే దృశ్యాలను ఇక్కడి తెరపై ఆవిష్కరిస్తాం. వాటినిబట్టి ఎవరికి ఏ బిరుదు ఇవ్వాలో సభికులే సూచించాలని కోరుతున్నాం' అన్నాడు.

అందరూ చప్పట్లు కొట్టారు. వేదికపై మెజీషియన్‌ 'అబ్రకదబ్ర' అనగానే తెరపై దృశ్యాలు ప్రత్యక్షమయ్యాయి.

ముందుగా ఓ పెద్ద చెయ్యి కనిపించింది. దాని వేళ్లకు దారాలు కట్టి ఉన్నాయి. ఆ దారాలకు ఒక బొమ్మ వేలాడుతోంది. తలపాగాతో, తెల్లటి గెడ్డంతో ఉన్న ఆ బొమ్మ, ఆ చెయ్యి ఆడించినట్టల్లా ఆడుతోంది. నేపథ్యంలో 'నోట మాట రాదు... నొసలు ముడుచుకోదు... చిరునవ్వు మాయదు... చిటపటలాడదు... చేష్టలుడిగిన బొమ్మ... చేతలుండని బొమ్మ... చెవిలోన పువ్వులు పెట్టునమ్మ...' అనే పాట వినిపించింది.

సభలోంచి ఒక వ్యక్తి నుంచుని, 'దేశంలోని అత్యున్నత పీఠంపై కూర్చుని మౌనంగా మహేంద్రజాలం చూపించిన నేత ఈయన. రిమోట్‌ కంట్రోలుతో నడిచే రోబో లాంటివాడు. ఈయన హయాములో జరిగిన కుంభకోణాల వల్ల వేలకోట్ల రూపాయల ప్రభుత్వ ఆదాయం మాయమైపోయింది. ఏం జరిగినా నిమ్మకు నీరెత్తినట్టు ఉండే ఈయనకు 'మహానత్త మాయక' అనే బిరుదు నప్పుతుంది' అన్నాడు. సభికులంతా అంగీకార సూచకంగా కరతాళధ్వనులు చేశారు.

వేదికపై మళ్ళీ 'అబ్రకదబ్ర' అనగానే తెరపై దృశ్యం మారింది. పచ్చగా కళకళలాడే ప్రాంతం కనువిందు చేస్తుండగానే ఉన్నట్టుండి అందులోని పంటపొలాలు మాయమయ్యాయి. భూములు, కొండలు 'హాం... ఫట్‌' అయిపోయాయి. నేపథ్యంలో 'ఎదురులేని కొడుకు... ఎన్నదగిన కొడుకు... నాన్న కుర్చీ కింద నంజుకున్న కొడుకు... కోట్లు కొల్లగొట్టి కులుకుతున్న కొడుకు... జైలుకెళ్లి జెల్లకొట్టిన కొడుకు...' అనే పాట వచ్చింది.

సభికుల్లోంచి ఒకతను లేచి, 'ఈయన సామాన్యుడా? గాలి, నీరు, భూమి, నింగి, నిప్పులను కూడా మటుమాయం చేసిన ఘనుడు. ఇతడికి 'పంచభూత వంచక మాంత్రిక' అనే బిరుదే సరైనది' అన్నాడు. అందరూ ఈలలు వేశారు.

వేదికపై దృశ్యం మారింది. ఓ యువకుడు ఏవేవో కాగితాలు చింపేస్తున్నాడు. ఉన్నట్టుండి 'నాన్సెస్‌' అని అరుస్తున్నాడు. ఓసారి గెడ్డంమాసి, మరోసారి దాన్ని నున్నగా గీసి అటూ ఇటూ నడిచేస్తున్నాడు. నేపథ్యంలో 'అందాల బుజ్జి బాలుడితడు... అమ్మ కొంగున వూయలూగునితడు... వారసత్వపు పాలపీకనెప్పుడూ నోట కరుచుకుని పీల్చుచుండునితడు...' అంటూ వినిపించింది.

సభికుడొకడు లేచి, 'ఇప్పుడిప్పుడే మేజిక్కులు నేర్చుకుంటున్నాడు. కానీ, ఏదీ సరిగా చేయలేకపోతున్నాడు. భవిష్యత్తులో గొప్ప ఇంద్రజాలికుడు కావాలనుకుంటున్నాడు. కాబట్టి, ఇతడికి 'నిరర్థక బాల మాయావి' బిరుదు ఇద్దాం' అన్నాడు.

ఇంతలో వేదిక మీదనుంచి భయంకర శబ్దాలతో దృశ్యం ప్రత్యక్షమైంది. తెరపై అంతా శూన్యం. ఆ శూన్యంలో ఉన్నట్టుండి పేలుళ్లు. ఎవరూ కనిపించకుండా మంత్రదండం తిరుగుతోంది. వెనక నుంచి, 'అధికారం మాయమమ్మా... న్యాయం ధర్మం మాయమమ్మా... సుఖం శాంతి మాయమమ్మా... దేశమంతా గందరగోళమమ్మా... సామాన్యుడు అతలాకుతలమమ్మా... అంతా నీ చలవమ్మా' అనే పాట కోరస్‌లో వినిపించింది.

ఇక ఉండబట్టలేని సామాన్యుడు లేచి నుంచున్నాడు. 'ఈమె సామాన్యురాలు కాదు. విదేశం నుంచి వచ్చిన ఈమె మ్యాజిక్కులు ఎవరికీ సాధ్యం కావు. కాబట్టి 'ప్రచ్ఛన్న పరిపాల భయంకర ఇంద్రజాలిక' అందాం' అన్నాడు. సభికులంతా లేచి నుంచుని మరీ కేరింతలు కొట్టారు!

PUBLISHED IN EENADU ON 22.02.2014

ఎన్నికల సరంజామా!

'గురూగారండీ... మరేం- ఎన్నికలొస్తున్నాయ్‌ కదండీ, బజార్లో సరంజామా కొనుక్కోవడానికి జాబితా రాసుకుని బయల్దేరానండి. ఇవి సరిపోతాయో లేదో కాస్త చెప్పరూ?' అంటూ ఓ పెద్ద సంచీ వూపుకొంటూ వచ్చాడు శిష్యుడు. 

గురూగారు వాడిని ఎగాదిగా చూసి, 'ముందు నీ జాబితా ఏంటో చెప్పు. దాన్నిబట్టి నీ బుద్ధేంటో, దాని లోతేంటో చెబుతా...' అన్నారు నిదానంగా.

'ఓ... మా ఆవిడను అడిగితే బోలెడు సరకులు చెప్పిందండి. మొదటగానేమో రెండు కిలోల మైదాపిండండి. ఆ తరవాత పురికొసలండి...' 

'మైదాపిండి, పురికొసలా? అవెందుకురా?'

'బలేవారే. మైదాపిండిని ఉడకబెట్టి పార్టీ జెండాల్ని పురికొసలకు అతికించడానికండి...'

'అబ్బో... మిగతా జాబితా కూడా చదివి ఏడు...'

'వెదురు బొంగులండి. ఎక్కడ పడితే అక్కడ పాతేసి జెండాలు కట్టడానికండి. ఆ తరవాతేమో పేడముద్దలండి...'

'పేడముద్దలా... అవెందుకు?'

'ఎదర పార్టీవాళ్ల జెండాల మీదకు విసరడానికండి. ఇంకానేమో వూరి చివర ఏట్లోంచి ఓ ట్యాంకుడు బురదండి. ప్రత్యర్థులపై బురద జల్లడానికండి. ఓ బస్తాడు బొగ్గులు, డజను చాటలండి. బొగ్గులు బాగా రాజేసి, ప్రతిపక్షంపై నిప్పులు చెరగడానికండి. అలాగే రెండు బస్తాల దుమ్ము, పారలండి. ఎగస్పార్టీ వాళ్లపై దుమ్మెత్తిపోయడానికండి. రెండు డ్రమ్ముల కిరసనాయిలు, నాలుగు డజన్ల అగ్గిపెట్టెలండి... ఉపన్యాసం ఇస్తూ వేరే పార్టీలపై మండిపడ్డానికి ఉంటాయని మా ఆవిడ చెప్పిందండి. అలాగే పోటీ నేతల మీద కారాలు, మిరియాలు నూరడానికి ఎండుమిర్చి, మిరియాలు, రోలు, పొత్రం ఇంకానేమో...'

ఆ సరికి గురువుగారికి కడుపులో తిప్పింది. 'ఆపరా బడుద్ధాయ్‌...' అంటూ ఒక్క అరుపు అరిచారు. 

శిష్యుడు డంగైపోయాడు.

'ఇన్నాళ్లూ నా దగ్గర రాజకీయాల్లో నేర్చుకున్నది ఇదేనట్రా బుద్ధి లేనోడా! ఎన్నికల సరంజామా గురించి భార్యల్ని అడుగుతార్రా ఎవరైనా? ముందా జాబితా చింపెయ్‌...'

శిష్యుడు వెంటనే చింపేసి, 'బుద్ధొచ్చిందండి. మరి ఎన్నికలకు ఎలా సిద్ధమవ్వాలో మీరే చెప్పండి గురూగారూ...' అన్నాడు.

గురువుగారు నిట్టూర్చి మొదలెట్టారు. 'ఓరి పిచ్చోడా... నేను చెప్పడం కాదురా. సమకాలీన రాజకీయాలను గమనించి నువ్వే తెలుసుకోవాలి. మొన్నటికి మొన్న మనదేశ యువరాజావారు ఎలాంటి ఉపన్యాసం దంచారో గుర్తు తెచ్చుకో. ఉదాహరణకు ఆయనేమన్నారు? మీ గిన్నెలో అన్నాన్నవుతా, ఆదుకునే అన్ననవుతా, నడిపించే సేనానవుతా, చేతిలో పుస్తకమవుతా... అనే ధోరణిలో రెచ్చిపోలేదూ? ఆ మాటల మతలబులు నేర్చుకోవాలి. తెలిసిందా?'

'ఓ... తెలిసిందండి. ఇంతకంటే బాగా చెబుతా వినండి. మీ టిఫిన్‌ తినే చెంచానవుతా. మీ ఇడ్లీలోకి చెట్నీనవుతా. మీ రోట్లో రోకలవుతా. మీ బకెట్లో చెంబునవుతా. మీ చొక్కాకు గుండీనవుతా. ఇలాగే కదండి...'

గురువుగారు పకపకా నవ్వారు. 'బాగా చెప్పావురా. ఆయన ఉపన్యాసం కంటే నీదే బాగుంది. ఆయన ఇంకా ఏమన్నారు? ప్రత్యర్థి పార్టీలు బట్టతలవాళ్లకు క్షవరం చేయించే బాపతని, మాటలు అమ్మేసే రకమని అన్నారు చూశావా? ఆ చాతుర్యం ఒంటపట్టించుకోవాలి...'

'చాలండి గురూగారూ! ఈ మాత్రం చెబితే రెచ్చిపోనూ. ఎగస్పార్టీవాళ్లు గుడ్డివాళ్లకు కళ్లజోళ్లు అమ్మే రకమని అనొచ్చండి. చెవిటివాళ్లకు రేడియోలు, మూగవాళ్లకు మైకులు, పొలాలు లేనివాళ్లకు నాగళ్లు, చొక్కాల్లేనోళ్లకు గుండీలు ఇస్తారని చెప్పేసేసి చాలా చెప్పొచ్చండి. అనడానికేముందండి... అయినా నాకు తెలియక అడుగుతానండీ, ఎగస్పార్టీవాళ్లు క్షవరం చేస్తారనడానికి ఇంకా ఏం మిగిల్చారండి వీళ్లు?'

'అబ్బో... అదరగొట్టావురా. నిజమే. మొత్తం క్షవరమంతా వాళ్లే చేశాక ఇంకేం మిగిలిందని? ఇక రాజమాత ఉపన్యాసం కూడా చదువుకో. అవినీతి మీద యుద్ధం చేయాలంటున్నారు. అసలు జరిగిన అవినీతంతా వాళ్ల హయాములోదే కద? లక్షల కోట్ల రూపాయల అక్రమాలు జరిగిన విషయాలేవీ గుర్తేలేనట్టు మాట్లాడారు చూశావా? అలాగే మనరాష్ట్రంలో యువనేత ఉపన్యాసాలు వింటున్నావుగా? స్వర్ణయుగం తెచ్చేస్తానంటున్నాడు... తండ్రిని అడ్డంపెట్టుకుని బంగారం లాంటి రాష్ట్రాన్ని దోచిన సంగతి దాచేసి! నువ్వు కూడా ఆ తెలివి కనబరచాలి...'

'అవునండి. మనం చేసిన అవకతవక, అక్రమాల పనుల గురించి ఎత్తకుండా, మళ్ళీ అధికారమిస్తే వాటినే తుదముట్టించేస్తామనొచ్చండి. అంతేకదండి'

'అద్గది. దార్లోకొచ్చావు. ఇప్పుడు రాసుకో, ఎన్నికలకు ఎలా సిద్ధం కావాలో. ఏమాత్రం సంకోచించకుండా ఎడాపెడా వాడేసుకోడానికి బోలెడన్ని అబద్ధాలు సిద్ధం చేసుకో. ఓడిపోతామనే భయం మనసులో ఉన్నా దాన్ని కప్పిపుచ్చుకొని మాట్లాడే నిబ్బరాన్ని, సిగ్గులేనితనాన్ని ఒంటపట్టించుకో. ప్రత్యర్థుల మీద రువ్వడానికి బోలెడు జోకులు, ఛలోక్తులు రాసుకుని ఉంచుకో. ఎగస్పార్టీవాళ్లకు అంటగట్టడానికి కులతత్వం, మతతత్వం, వేర్పాటువాదం, అవసరమైతే ప్రజల మధ్యే చిచ్చుపెట్టే నైపుణ్యం, అవినీతిపరులు జైల్లో ఉన్నా వారిని విడిపించి మరీ నాటకాలాడించే నేర్పరితనం, దొంగలతోనైనా దోస్తీకట్టే చాతుర్యం, అమలు చేసే ఉద్దేశం లేకపోయినా ఏకబిగిన చదవడానికి అర్థంపర్థం లేనివైనా సరే బోలెడు హామీలు రాసుకుని ఉంచుకో. ఇవన్నీ బజార్లో దొరికేవి కాదు కాబట్టి, ఆ సంచి అవతల పడేసి నీ బుర్రకు పదునుపెట్టుకో. అప్పుడిక నీదే గెలుపు. ఇక పోయిరా!'

PUBLISHED IN EENADU ON 28/01/2014

నిజమైన పండగ!

'భగభగా మండేను భోగి మంటల్లు...

భోగి మంటల్లోన కాలేను కష్టాలు'

- చప్పట్లుకొడుతూ చుట్టూ తిరుగుతోంది ఎంకి. తిరుగుతున్నదల్లా చటుక్కున ఆగి, 'బావా... బావా... ఒక్కసారి ఎవరెవరు ఎలాంటి మంటలేత్తన్నారో చూసొద్దామా?' అంది సరదాగా. బావ నవ్వుకుని, 'సరే... పద' అన్నాడు.

ఇద్దరూ కలిసి ఓ వీధిలోకి వెళ్లారు. అక్కడొక నాయకుడి ఇల్లు ఉంది. ఆయన అనుచరులతో వచ్చి భోగి మంటల్లో ఏవేవో పడేస్తున్నాడు.

'ఏంటి బావా ఏత్తన్నాడు?' అడిగింది ఎంకి.

బావ పరిశీలనగా చూసి, 'ప్రజలకిచ్చిన వాగ్దానాలు' అన్నాడు.

'అదేంటి? ఎవురైనా భోగి మంటల్లో పిడకలేత్తారు, కట్టెలేత్తారు కానీ ఇలాంటియ్యి కూడా ఏత్తారేటి?' అంది ఎంకి.

'ఆయనెవరనుకున్నావు? అధికార పార్టీ నేత. మొన్నటి ఎన్నికలప్పుడు ఇచ్చిన వాగ్దానాలు అమలయ్యేనా, చచ్చేనా? ఆయన దగ్గర తగలబెట్టడానికి ఇంకేముంటాయి మరి?' అన్నాడు.

'అదేటి బావా అలాగంటావు? 'జనానికిచ్చిన మాటలన్నీ నిలబెట్టేసుకున్నాం... సెప్పినవన్నీ సేసేశాం... అసలిన్నేసి మంచి పనులు సేసిన పార్టీ మరోటి లేదు' అని వూదరగొడతారు కదా? నువ్వేటి అట్టా తీసి పారేత్తన్నావు?'

'వూరుకోయే! ఇన్నాల్లూ ఆల్ల పాలన ఎలాంటిదో సూసినా బుద్ధి రాలేదేంటి నీకు? తొమ్మిదేళ్లక్రితం నేనొక్కడినీ పనిసేసి తెచ్చిన రూకల్తో ఇల్లంతా గడిచేది. పైగా పదో పరకో... ఎదర కర్సులకి డిబ్బీలో ఏసేటోల్లం. గుర్తులే? అప్పుడు బియ్యం ధరకి, ఇప్పటి ధరకి పొంతన ఉందాని? పోపులోకి సిటికెడు నూని కోసం గిజగిజలాడిపోతన్నావు. వారానికోపాలైనా పట్టెడు కూరన్నం తినగలుతున్నామా సెప్పు? మనమెవ్వరం పేదోల్లం కాదంట. ఈల్లందరూ కలిసి కాకి లెక్కలన్నీ ఏసి 'అబ్బెబ్బెబ్బెబ్బే... మనదేశంలో పేదోల్లు అంతకంతకు తగ్గిపోతన్నా'రని ప్రెచారాలు కూడాను' అన్నాడు బావ కోపంగా.

ఇంతలో ఆ నేత అనుచరుడు మరిన్ని కట్టలేవో తెచ్చి మంటల్లో పడేశాడు. మంటలు ఒక్కసారిగా భగ్గుమన్నాయి.

'ఓలబ్బో... పెద్ద భోగిమంటే. ఇప్పుడేటి తెచ్చి పడేశాడు బావా?' అంది ఎంకి.

'ఇప్పుడేసినవి ప్రజలకోసం ఆల్లు పెట్టిన పదకాలే! ఆటి అమలులాగే ఇయ్యీ తగలడుతున్నాయి సూడు'

'బావా? ఈల్లు మనకోసం పెట్టిన పథకాలూ సరిగా లేవంటావా?'

'నువ్వు మనిషివి ఎదిగావు కానీ బుద్దిలో సిన్నతనం ఇంకా పోలేదే? ఓ... భోగిమంటలు సూద్దారన్న సరదాయే కానీ, మన సుట్టూ ఉన్న కష్టాల మంటల సెగ ఏంటో కానుకున్నట్టు లేవు...'

'అట్టా కోప్పడకు బావా... కూసింత ఇవరంగా సెప్పొచ్చుగా?'

'మరదే... ఏమన్నా అంటే బుంగమూతెడతావు. కాస్త చుట్టూ జరుగుతున్నది సూస్తూ ఎరిక పెంచుకోవాలని ఎన్నిసార్లు సెప్పినా బుర్రకెక్కించుకోవు. ఈల్లు, ఈల్ల మనుషులు వూరూవాడా నానా కంగాళీచేసి బోలెడేసి పథకాలు పెట్టేశారా? తామసలు పుట్టిందే ప్రెజానీకం కోసమన్నట్టు, వాళ్లని ఉద్దరించడానికన్నట్టు మాట్లాడారా? తొమ్మిదేళ్లలో మనం కానీ, మన సుట్టూ ఉన్న మన్లాంటి బడుగు బతుకులోల్లు కానీ ఎదిగామా? కానీ ఈ నేతలు, ఆల్ల అనుచరులు, ఆల్ల బంధువులు, తోకగాళ్లకేసి సూడు. నడుచుకుంటా పోయేటోడు ఇవాల స్కూటరెక్కాడు. సైకిల్‌బెల్లు కొట్టేవోడల్లా కారు హారను మోగిత్తన్నాడు. అద్దె ఇంట్లో కాలక్షేపం సేసేటోడు సొంతింట్లోకి మారాడు. తెలుత్తోందా?'

'పోన్లే బావా... పాపం ఆల్లు ఎదిగితే మనకెందుకు బాద? మనం ఎదగలేదని ఏడవాలి కానీ...'

'సాల్లే... మా బాగా సెప్పావు, ఏదాంతం. ఆల్లంతా నిజమైన అర్హతలుండి ఎదిగితే నాకెందుకు ఉలుకు? ఆ పార్టీ పేరుమీద ఎదిగినోల్లంతా మనలాంటి పేదోల్ల పేరు సెప్పుకొని ఎదిగినోల్లే మరి. పేదలకి ఇల్లిత్తామన్నారా? ఏదీ మనగ్గాని, మన పక్కోడిగ్గాని వచ్చిందా... లేదే? ఆడెవడో ఆ పార్టీ నేత కండువా మోసేటోడు దొంగ పత్రాలు సూపించి ఆ ఇల్లు కొట్టేశాడు. ఒక్క మనూళ్లోనే కాదే, అంతా ఇదే తంతు. ఆ నేతలు సెప్పినోల్లందరికీ ముందిచ్చాకే, ఒకటో అరో పేదోల్లకిచ్చి మా గొప్ప పన్లు సేసుకుంటున్నట్టు టీవీల్లో, సబల్లోను వూదరగొడుతున్నారు. పేదలకి వైద్దె పదకమన్నారు... ఏదీ?అంతకన్నా సిత్రం, మన సుట్టూతా ఉండే పొలాలన్నింటికీ నీళ్లొచ్చేత్తాయని కాలవల పని మొదలెట్టారా? వాటిలో ఎన్నింట్లో పన్లు పూర్తయ్యాయి? ఎన్నింట్లో నీళ్లొచ్చాయి... సూసుకో. సెప్పేది కొండంత, జరిగింది పిసరంత. కానీ ఆ పనుల పేరు సెప్పి కోటానుకోట్ల సొమ్ము ఆ పార్టీవోళ్ల జేబుల్లోకే పోయిందంట. ఎందుకంటే ఆల్లే ఆ పన్లు సేసేత్తామని కాంటరాక్టర్ల అవతారమెత్తారు మరి'

'పోన్లెద్దూ బావా... కోట్లకు కోట్లు ఎవురో ఎవురికో ఇత్తే మనకేంటంట?'

'ఏడిశావ్‌, ఎర్రిమొగవా? ఆ డబ్బంతా ఏంటనుకున్నావు? మనం, మన్లాంటి ప్రెజలంతా పన్నుల రూపంలో కట్టిందే మరి. ఇలా పోగడిన సొమ్మునంతా సక్రమంగా పేదోల్లకే కర్సు సేసుంటే నువ్వూ నేను, ఇయ్యాల ఇలాగుండకపోదుం'

'ఎరికైంది బావా? ఈల్ల పాలన కంటే పెద్ద భోగిమంట ఏటుంటాది? ప్రతీదీ తగలెట్టాశారన్నమాట. పోన్లే. మరో ఇంటికి పోదాం పద'

ఎంకి, బావ కలిసి ఇంకోచోటకి వెళ్లారు. అక్కడొక యువనేత ఇంటి ముందు భోగి మంట మరింతగా భగభగలాడుతోంది.

'ఓలబ్బోలబ్బో... ఎంతలేసి మంటలు బావా? ఈయనేంటి పడేత్తన్నాడో?'

'ఈయన ఎవరనుకుంటున్నావు? ఒకప్పటి నేత కొడుకే. ఆ తండ్రి అండతో ఇతడు మొత్తాన్నీ సుట్టబెట్టేశాడు. పచ్చటి పొలాల్ని, గనుల్ని ఏవేవో పరిశ్రమల పేరు సెప్పి పెద్దోల్లకి ఆ తండ్రి రాసిచ్చేత్తే... ఇతగాడు అలా బూములు దండుకున్నోల్ల దగ్గర్నుంచి డబ్బులు నొల్లుకునేవాడు. అలా ఒకటా, రెండా... లక్ష కోట్లు బొక్కేశాడంట. అందుకే ఆ మధ్యన ఇతడిని కటకటాల ఎనకేశారు. ఇప్పుడు బెయిలుమీద బయటకొచ్చాడులే'

'మరంత బొక్కేసినోడిని ఎలా వదిలేశారు బావా?'

'అదో పెద్ద రాజకీయంలే! ఎన్నికలొత్తన్నాయి గందా? ఎట్టాగొట్టా మాయమాటలు సెప్పి మనకాడ ఓట్లు పొందేద్దారని వదిలేశారంట'

'మరీయన ఏటేత్తన్నాడు మంటల్లో?'

'తను సేసిన మోసాలు, కుట్రలు, కుతంత్రాలు, అవకతవకల తాలూకు సాచ్చికాలన్నీ పడేత్తన్నట్టున్నాడు...'

'వార్నాయనో... అయితే మన బతుకుల్లో మంటలెట్టి ఆల్లు భోగమనుభవిత్తన్నారన్నమాట. సాల్లే మావా... ఇంకే భోగి మంటలు సూడక్కర్లేదు. అసలీల్లందరినీ మనవెయ్యాలి భోగిమంటల్లో. పద... ఉన్నదేదో వండుకుని తిని తొంగుందారి. మన్లాంటోల్లకి పండగైనా ఒకటే, పబ్బమైనా ఒకటే. ఇలాంటి తప్పుడు సాముల్ని రేపొచ్చే ఎన్నికల్లో ఇంటికి అంపించాకే మనకి నిజమైన సంక్రాంతి!'

'నీకూ బుద్దొచ్చిందిగా? ఇక మనకంతా పండగేలే!'

PUBLISHED IN EENADU ON 13.01.2014