నవ రాగాలు

ఎన్నికల ఫలితాలు వచ్చిన సంబరంలో యువతీ యువకులు కేరింతలు కొడుతూ ఒక చోట చేరారు. ఓటు హక్కు వినియోగించుకుని, అవినీతికి వ్యతిరేకంగా నవతరం తీర్పునిచ్చి ఆ ఫలితాలను ఆస్వాదిస్తున్న వాళ్లంతా సంబరాలు చేసుకుంటున్నారు.

'ఇప్పుడు అందరం సరదాగా తలా ఒక పాట పాడాలి...' అన్నాడో సరదాల కుర్రాడు.

'అయితే ఓ షరతు. అన్నీ పేరడీ పాటలే పాడాలి...' అందో కిలకిలల కన్నెపిల్ల. అందరూ సరేనంటే సరేననుకున్నారు.

ఆ రాగాల సరాగాలు ఇలా సాగాయి.

* * *

'ఎందుకొచ్చిన ఎన్నిక

ఓ అవినీతి బాలకా!

గెలవడమంటే తేలికా?

జైలుకి పదమ్మా చాలిక!'

అన్నాడో తుంటరి. అంతా కిసుక్కున నవ్వారు.

తరవాత వంతు అందుకున్నాడొక యువకుడు

'కారులో కటకటాలకెళ్లే

కరుకు బుగ్గల కటికవాడా!

కొల్లగొట్టిన కోట్ల సొమ్ము

ఎలా వచ్చెనో చెప్పగలవా?' అంటూ నవ్వేశాడు. ఇంతలో పక్కనున్నవాడు అందుకుని

'కడుపు కాలే కష్టజీవులు

కూలికెళ్లి పన్నులు కడితే...

వాళ్ల సొత్తును అక్రమంగా

మింగినావు తెలుసుకో!'

అందరూ చప్పట్లు కొట్టారు.

ఒకమ్మాయి గొంతు సవరించుకుంది-

'అండా దండా ఉంటాడని

మీ నాన్న మాటకు అండనిస్తే

గుండె లేని మనిషల్లే...

కొండా కోనలు కాటేశాడా?

అప్పనంగా... దోచి...

మహ గొప్పలు నీవు చెప్పుకొంటే

వస్తుందమ్మా ఒక రోజు...

అక్రమాలకు జైలు ఆ రోజు!' అంది రాగయుక్తంగా. కుర్రాళ్లంతా వంత పాడుతూ కేరింతలు కొట్టారు.

మరో అమ్మాయి లేచి సన్నని గొంతుకతో ఇలా పాడింది

'ఇది కుట్రల కాలమనీ... తప్పుల తరుణమనీ

తొందరపడి ఓ కాకిపిల్ల ముందే కూసింది...

విందులు చేసింది

ఇక కసిరే కేసులు కాల్చునని

మరి ముసిరే తప్పులు తరుమునని

ఎరుగని కాకిపిల్ల ఎగిరింది

విరిగిన రెక్కల ఒరిగింది

నేలకు కూలింది...' అనగానే నవ్వులు మిన్నంటాయి.

ఇంతలో ఓ బండకళ్లద్దాల బుల్లోడొకడు లేచాడు

'బాబూ వినరా

తండ్రీ కొడుకుల కథ ఒకటి

కలతలు ఉన్న కమ్మని సీమలో

సాగించారు కుతంత్రాల కాపురం...' అనగానే అందరూ ఫకాలుమని నవ్వారు.

ఇంతలో ఓ అమ్మాయి లేచి నిలబడి స్టెప్పులు వేస్తూ మొదలెట్టిందో పాట

'డిఫెక్ట్‌గాడే బలే డిఫెక్ట్‌గాడే...

కటకటాలకు కనెక్ట్‌ అయితే...

డిస్కనెక్ట్‌ కాడే...!' అనేసరికి పకపకలు మిన్నంటాయి.

మరో కుర్రాడు లేచి అందుకున్నాడు

'ఎవడు వాడు? ఎచటి వాడు?

ఇటు వచ్చిన కంత్రీగాడు...

ప్రజల ధనం జనుల ధనం

దోచుకునే దొంగవాడు

భూమి ధనం గనుల ధనం

కబళించే దుండగీడు

తగిన శాస్తి చేయరా... ఆ...ఆ...ఆ...

తరిమి తరిమి కొట్టరా' అంటూ పాడుతుంటే కుర్రాళ్లంతా కోరస్‌ పాడి రక్తి కట్టించారు.

ఇంతలో ఓ యువకుడు అలనాటి ఓ అందాల నటుడిని అనుకరిస్తూ ఓ చేత్తో కాలర్‌ పట్టుకుని మరో చేతి చూపుడు వేలు పైకెత్తి పాడసాగాడు...

'ఎవరి కోసం ఎవరి కోసం

ఈ దోపిడీ పర్వం? ఈ అవినీతి సర్వం?

ఎవరి కోసం... ఎవరి కోసం...

పథకాల భిక్ష నువ్వే పెట్టి

పేదల ఆశలు కొల్లగొట్టి

భూములన్ని చుట్టబెట్టి జనుల జెల్ల కొట్టావు

బతుకు నీకు ఇచ్చాము...

ఉతికి ఉతికి దోచావు...'

అనేసరికి అందరూ పగలబడి నవ్వసాగారు.

ఇంతలో ఓ పెద్దాయన అటుకేసి ముసిముసిగా నవ్వుతూ వచ్చారు. 'సరేలెండర్రా... పోయిన అవినీతి సంగతి వదిలేసి ఇప్పుడు వచ్చిన కొత్త శకం గురించి కూడా పాడండి మరి' అన్నారు.

యువతరమంతా ఒక చోట చేరి కోరస్‌గా అందుకున్నారు

'అదిగో నవలోకం... విరిసే మన కోసం' అంటూ పాడారు.

'ఉందిలే మంచి లోకం ముందుముందున

అందరూ సుఖపడాలి నందనందన' అంటూ కేరింతలు కొడుతూ ఆనందించారు!

PUBLISHED IN EENADU ON 19/05/2014

అదీ అసలు సంగతి!

'ఏంటయ్యా సెక్రట్రీ... బయటేంటి కోలాహలం?' 

'ఎక్కడెక్కడి నుంచో చాలామంది తమ దర్శనానికి వచ్చారండి' 

'ఎవరు వాళ్లు?' 

'అదే అడిగానండి. అందరూ తమ తమ వృత్తి వ్యాపారాలేమిటో చెప్పారండి' 

'ఏమని చెప్పారు?'

'వాళ్లలో కొందరు దొంగలండి. మరి కొందరు దోపిడిదారులండి. కొందరు హత్యలు కూడా చేసిన వాళ్లున్నారండి. ఇంకా అవినీతిపరులు, అక్రమ వ్యాపారులు, కోర్టు కేసుల్లో నిందితులు, బెయిల్‌ మీద ఉన్నవాళ్లు, లంచగొండులు అంటూ చెప్పుకొచ్చారండి' 

'ఏంటిట సంగతి?' 

'మిమ్మల్ని కలుస్తామంటే ఠాఠ్‌... వీల్లేదని కేకలేశానండి. మరి ఇట్లాంటి దగుల్బాజీలు వచ్చారంటే మీకెంత అప్రతిష్ఠ, ఎంత నామర్దా అనండి. అయితే వాళ్లు వినలేదండి. నువ్వెళ్లి మేమెవరో అయ్యగారికి చెప్పూ, ఆయనకు అర్థమవుతుందిలే... నువ్వెవడివో కొత్తోడిలా ఉన్నావని హాల్లో కూర్చుండిపోయారండి. మరి పోలీసుల్ని పిలిపించి బయటికి గెంటెయ్యమంటారా?' 

'భలేవాడివయ్యా సెక్రట్రీ! నీకింకా కొన్ని విషయాలు బోధపడినట్టు లేదు. వాళ్లంతా మనకు కావలసిన వాళ్లేలే. త్వరలో అధికారంలోకి రాబోతున్నామనే అభిప్రాయంతో పరాకు లేకుండా పేర్లు చెప్పుకొని పోదామని వచ్చుంటారు' 

'అయ్యా... ఇలాంటివాళ్లతో మీరు కలిసి మాట్లాడితే అంతగా బాగుండదేమోనండి. సెక్రట్రీగా నా బాధ్యత గుర్తొచ్చి చెబుతున్నాను. ఆనక మీ ఇష్టం' 

'ఓరోరి... వెర్రి సెక్రట్రీ! మనం ఎదిగిందే ఇలాంటివాళ్ల అండదండలతోరా! వాళ్లందరూ వేర్వేరుగా చేసిన పనులన్నీ మనం ఒక్కళ్లమే ఎడాపెడా చేసేసి ఈ దశకొచ్చాం కదా? పులకరించిపోయి పలకరించడానికి వచ్చుంటారు. పద మాట్లాడదాం. అన్నట్టు... వాళ్లందరికీ కూల్‌డ్రింకులు పంపించు'

* * *

'దండాలండయ్య. తమరు పెద్ద మనసు సేసుకుని తమ దర్శనం కలిగించడమే మా అందరి పున్నెమండి. ఈల్లంతా తమర్ని దగ్గరగా సూడాలని, కుదిరితే ఒక్కసారి తాకాలని తెగ సంబరపడిపోతుంటే నేనే దగ్గరుండి తీసుకొచ్చానండి' 

'మీ అభిమానం సరేకానీ, ఇలా అందరూ ఒకేసారి వచ్చేస్తే ఎలాగయ్యా? మీడియా చూ స్తే కోడై కూయదూ?' 

'ఆ... మీడియాదేముంది లెండయ్య. ఎన్నిసార్లు తమరి లీలల గురించి రాయలేదూ? అది కోడై కూస్తే తమరు సూత్తా వూరుకుంటారా? పామై బుసకొట్టడం లేదూ. పత్రికల్లో తమరి కుంభకోణాలు, అక్రమార్జనలు, అవినీతి లావాదేవీలు, లోపాయకారీ యవ్వారాలు, దోపిడిలు, హవాలా పనులు... ఇవన్నీ చూసినప్పుడల్లా మేమంతా ఉబ్బితబ్బిబ్బైపోతామండి. అందుకనే అందరం కూడబలుక్కుని బయల్దేరి వచ్చామండి. తమరు మా యందు దయుంచాలి' 

'సర్లెండయ్యా, అధికారం అందనీయండి. ఇక మనందరికీ స్వర్ణయుగమే. ప్రజాపథకాలు పెట్టి వాటికి లబ్దిదారులుగా అర్హుల్ని పక్కనపెట్టి మిమ్మల్నే ఎంపిక చేయిస్తా. ప్రాజెక్టులు మొదలుపెట్టి అసలైన టెండర్లను నిరాకరించి మీకే కాంట్రాక్టులు ఇప్పిస్తా. మీరే పనీ చేయకపోయినా అంచనాలు పెంచేసి బిల్లులు పాస్‌ చేయిస్తా. పరిశ్రమలకని చెప్పి రైతుల నుంచి భూములు వూడలాక్కుని మీకే ఇప్పిస్తా. ఎంచక్కా రియల్‌ఎస్టేటు వ్యాపారం చేసుకుందురు గాని. ఇలా చిన్న చితక పనుల నుంచి పెద్ద పెద్ద గనుల దాకా అందరం కలిసి దోచుకుందాం. సరేనా? ఇక పోయిరండి...' 

'దండాలయ్య... ఇక ఉంటామండి'

* * *

'ఏం సెక్రట్రీ, ఇప్పుడర్థమైందా మన సంగతేంటో?' 

'అబ్బో... అద్భుతంగానండి. ఇంతలేసి పెద్దమనుషులొస్తే గ్రహించుకోలేకపోయాను క్షమించండి' 

'పర్లేదు లేవయ్యా. ఇంతకీ ప్రచారం బాగా జరిగిందా? మన ఉపన్యాసాలెలా ఉన్నాయి? జనం ఏమనుకుంటున్నారో వాకబు చేశావా?' 

'ఎందుకు చేయనండి. అది నా బాధ్యతే కదండీ? తమరు అమాయక జనాన్ని బాగా నమ్మించారండి. మిమ్మల్ని విమర్శించినవారి పుట్టుపూర్వోత్తరాలు బయటికి లాగి విషయం ఉన్నా లేకున్నా వూదరగొట్టి ప్రజల్ని గందరగోళ పరచారండి. దోచుకుతిన్న కోట్లాది రూపాయల్ని పకడ్బందీగా వూర్ల వూర్లకీ చేరవేసి చాపకింద నీరులా పంచి పెట్టించారండి. మందు సీసాలు లోడ్లకు లోడ్లు తరలించి తెగ తాగించారండి. రకరకాల పథకాలు ప్రకటించి ప్రలోభాలకి, భ్రాంతులకి గురి చేశారండి. ఇక దొంగ ఓట్లకి, రిగ్గింగులకి, బూత్‌కాప్చరింగులకి ముందస్తు ప్రణాళికలు సిద్ధం చేశారండి. ఇన్ని చేశాక ఇక తిరుగేముంటుందండీ?' 

'అయితే గెలుస్తామంటావ్‌?' 

'సార్‌... అక్కడే చిన్న సందేహమండి. తమరు కోప్పడనంటే చెబుతాను. మీరు చేసిన ప్రసంగాలే మిమ్మల్ని ఓడిస్తాయేమోనని నా భయమండి' 

'అదేం అపశకునమయ్యా, ఏమన్నాను నేను?' 

'ఏముందండీ? తమరు ప్రజల్ని నమ్మించే ఆవేశంలో అసలు సంగతి మర్చిపోయినట్టున్నారు. ప్రతీసభలో ఒకేరకమైన పిలుపునిచ్చారండి. అదే సందేహంగా ఉందండి' 

'చంపకుండా అదేంటో సెప్పవయ్యా...' 

'అదేసార్‌! నీతిపరులకే ఓటెయ్యమని, మేలు చేసేవారినే ఎన్నుకోవాలని, నిజాయతీ నేతలకే పట్టం కట్టాలని, సచ్ఛీలురనే గెలిపించాలని... పదే పదే చెప్పారండి. మరి జనమంతా మీ మాట వినేట్టయితే, ఆ లెక్కన ఓట్లన్నీ మీకు పడవు కదండి? తమరి చరిత్రను తమరే మరిచిపోయి ఇలా పిలుపిస్తే ఎలాగండి? అదొక్కటే నా బెంగండి. వెళ్లొస్తానండి!'

PUBLISHED IN EENADU ON 07.05.2014

అసలైన చికిత్స!

డాక్టర్‌ పిచ్చేశ్వర్రావు ఆసుపత్రికి పంకజాక్షి ఆదరాబాదరా వచ్చింది. పక్కనే ఆమె భర్త అప్పారావు కోపంగా, చిరాగ్గా చూస్తూ నుంచుని ఉన్నాడు.

'డాక్టర్‌! ఈయన ఉదయం లేస్తూనే వింతగా ప్రవర్తించడం మొదలు పెట్టారండి. మీరే కాపాడాలి' అందామె కొంగును నోట్లో దోపుకొంటూ.

'ఛ... నోర్ముయ్‌! చమడాలు వలిచేస్తా' అన్నాడు అప్పారావు.

పంకజాక్షి గుడ్లనీరు కుక్కుకుని, 'పెళ్లయిన దగ్గర్నుంచి ఒక్కమాట అని ఎరగరండి. ఏది పెడితే అది నోరు మూసుకుని తినేవారు. పెళ్లయిన కొత్తలో ఈయనకసలు నోట్లో నాలుక ఉందో లేదోనని ఆయన నిద్రపోతున్నప్పుడు నోరు తెరిచి పరీక్షించాను కూడానండి. నోట్లో వేలుపెడితే కొరకరు సరికదా, చంటి పిల్లాడిలా చీకుతారండి. అలాంటి మనిషి ఇలా నానా తిట్లూ తిడుతున్నారండి. ఏదైనా పిచ్చి పట్టిందేమోనని భయమేస్తోందండి'

డాక్టర్‌ పిచ్చేశ్వర్రావు తలపంకించి అప్పారావుతో 'మిమ్మల్నోసారి పరీక్షించాలి. ఇలా కూర్చోండి' అన్నారు.

'నువ్వెవరు నన్ను పరీక్షించడానికి? వెళ్లి మీ నాన్నని పరీక్షించుకో, అమ్మని పరీక్షించుకో. నా జోలికొస్తే తాట తీస్తా' అన్నాడు అప్పారావు.

డాక్టర్‌ పిచ్చేశ్వరరావు పంకజాక్షికేసి తిరిగి, 'కొన్ని రోజులుగా మీవారు ఎక్కడెక్కడ తిరిగారో, ఏం చేశారో చెప్పగలవామ్మా?' అని అడిగారు.

'ఆయ్‌... ఎన్నికల కాలం కదండీ! కనిపించిన ప్రతి రాజకీయ నాయకుడి సభలకు పోయొచ్చేవారండి. ఏ నేత రోడ్‌ షో పెట్టినా ఈయన ఉండాల్సిందేనండి. ఇంట్లో టీవీలో కూడా అన్నీ ప్రచారం వార్తలే చూసి చూసి చంపేశారండి బాబూ...' అంది పంకజాక్షి.

డాక్టర్‌ పిచ్చేశ్వర్రావుకు విషయం అర్థమైంది.

'నువ్వేం కంగారుపడకమ్మా. నేను నయంచేస్తా కదా?' అన్నారు.

ఇంతలో అప్పారావు దిగ్గున లేచి, 'తోలు వలుస్తా! తొక్కలో కబుర్లు నువ్వూను. నాకే రోగం లేదని సవాలు చేస్తా, నువ్వు చేస్తావా? నీ మాట అబద్ధమైతే నీ స్టెతస్కోపు నాకిచ్చేయాలి. నిజమైతే నా మొలతాడు నీకిచ్చేస్తా. సవాలుకు సిద్ధమేనా?' అన్నాడు.

డాక్టర్‌ పిచ్చేశ్వర్రావు నవ్వి, 'అలాగే అప్పారావు! మీకే రోగం లేదు. ఉన్న రోగాలన్నీ మన రాష్ట్ర ప్రజలకు, నాయకులకే ఉన్నా యి. సరేనా?' అన్నారు.

'ఏం సోయి తప్పి మాట్లాడుతున్నవా? జనానికేం రోగముంటది? ఉన్న రుగ్మతలన్నీ నాయకులకే ఉంటవి. ఆల్లంతా ఆగమాగం చేస్తంటే నువ్వేం తమాషా చూస్తన్నవా?' అని భార్య కేసి తిరిగి, 'ఈడి పేరేంటి, పిచ్చేశ్వర్రావు కదూ?' అని అడిగి, మళ్ళీ డాక్టర్‌కేసి చూస్తూ, 'నేను చిటికేస్తే వెయ్యి ముక్కలవుతావు' అన్నాడు.

ఈలోగా డాక్టర్‌ సైగ చేయడంతో నర్సు వచ్చి అప్పారావును కూర్చోబెట్టింది. అప్పారావు ఆమెను చూస్తూనే చటుక్కున ఆమె బుగ్గలు నిమిరాడు. రెండు చేతుల్తో ఆమె తలవంచి నడినెత్తిన ముద్దుపెట్టుకుని, మెత్తగా నవ్వుతూ 'నర్సులారా... అమ్మలారా... అక్కలారా... రాబోయేది స్వర్ణయుగం. నేనే సీఎం అవుతా. అప్పుడు మీకందరికీ బంగారు సిరెంజీలు ఇస్తా. వాటితో పొడవడానికి ఉచితంగా రోగుల్ని సరఫరా చేస్తా. నా మీద మా ఆవిడ, ఈ డాక్టరు కుట్ర పన్నుతున్నారు. కానీ, జనమంతా నా వెనకే ఉన్నారు. బై ది బై... నువ్వు కొత్త ఆసుపత్రి కట్టుకోవడానికి భూమినిప్పిస్తా, దాని విలువలో సగం నాకిస్తావా? పోనీ నా పది రూపాయల కంపెనీ షేర్లు మూడువేలు పెట్టి కొనుక్కుంటావా?' అన్నాడు.

ఇంతలోనే డాక్టర్‌ పిచ్చేశ్వర్రావు అతడికి ఓ ఇంజెక్షన్‌ ఇచ్చారు. దాంతో అప్పారావు ఏదో మత్తులో ఉన్నట్టుగా, 'నీ నాలుక తెగ్గోస్తా... నా జోలికొస్తే ఖబడ్దార్‌... నువ్వొక రావణాసురుడివి... కంసుడివి... హిరణ్య కశిపుడివి... లోఫర్‌వి... డాఫర్‌వి... అనకొండవి... తోడేలువి... కుక్కవి... గాడిదవి... తోలు వలుస్తా... తీట తీసేస్తా... చర్మం వలిచేస్తా... గుడ్డలిప్పదీస్తా... చెప్పుతో కొడతా...' అంటూ గొణగసాగాడు.

పంకజాక్షి వెక్కి వెక్కి ఏడుస్తూ 'ఈయనకి ఏమైందండీ?' అంది.

డాక్టర్‌ పిచ్చేశ్వర్రావు 'మరేం ఫర్వాలేదమ్మా... రకరకాల రాజకీయ నాయకుల విమర్శలు, ప్రతి విమర్శలు, ఆరోపణలు, తిట్లు, శాపనార్థాలు విని విని మీవారి మనసు, బుర్ర గందరగోళానికి గురయ్యాయి. నేతలు ఇంతలా దిగజారి మాట్లాడటం, సహజంగా నెమ్మదస్తుడైన మీ వారిని కలవరపరచింది. అంతే!' అన్నారు.

'మరి ఈయనకి ఏంటండీ చికిత్స?' అంది పంకజాక్షి.

డాక్టర్‌ పిచ్చేశ్వర్రావు ఆమెను ఆగమంటూ సైగ చేసి, అప్పారావు దగ్గరకు వెళ్లి, 'అప్పారావుగారూ, ఇప్పుడెలా ఉంది?' అన్నారు.

'నాకు కాదండీ... అవినీతిపరులు, చిత్తశుద్ధి లేనివారు, ప్రజల్లో విద్వేషాలు పెంచేవాళ్లు, నేరారోపణలు ఉండీ జైలుకెళ్లినా బెయిలు మీద వచ్చి సిగ్గులేకుండా జనానికి మాయమాటలు చెప్పేవారు, ప్రజల ఆస్తులు దోచుకునేవారు, అక్రమంగా కోట్లకు కోట్లు దోచుకున్నవారు... వీళ్లందరికీ ఉందండీ మాయరోగం! వీళ్లా చెప్పండి మన అభ్యర్థులు? ముందువాళ్లకు చెయ్యండి వైద్యం...' అన్నాడు అప్పారావు నీరసంగా.

'నేను కాదు, ఇలాంటి నీచ రాజకీయ నేతలందరికీ మీరే చక్కని వైద్యం చేయగలరు' అన్నారు డాక్టర్‌.

ఆ మాటలకు అప్పారావు ఉత్సాహంగా లేచి కూర్చుని 'నేనా... ఎలా?' అన్నాడు.

'మీ ఓటు వేయడం ద్వారా. అవినీతిపరులైన అసుర నేతల్ని మీ ఓటు అనే వజ్రాయుధంతో శిక్షించండి. పనిచేసే నేతనే ఎన్నుకోండి. మీ చేతిలోని ఓటే సమాజంలోని అన్ని రోగాలకూ చికిత్స' అన్నారు.

'మనసులో దిగులంతా మాయం చేశారు డాక్టర్‌' అంటూ అప్పారావు లేచి కూర్చున్నాడు. పంకజాక్షి ఆనందంతో కళ్లు తుడుచుకుని డాక్టర్‌కి నమస్కరించింది.

PUBLISHED IN EENADU ON 30.04.2014

అసలు నిజం గ్రహిస్తే...

సెక్రట్రీ' 

'.......' 

'సెక్రట్రీ! ఏంటయ్యా, పిలిచినా పలక్కుండా ఏదో ఆలోచిస్తున్నావ్‌?'

'స...స... సార్‌! మన్నించండి. మనసేం బాగోలేదండి'

'అరెరె, అదేంటయ్యా, ఉన్నట్టుండి ఆ కన్నీళ్లేమిటి?'

'గుండె తరుక్కుపోతోందండయ్య'

'ఎందుకయ్యా అంతలా దుఃఖపడుతున్నావు... కొంపదీసి ప్రజలుగానీ చైతన్యవంతులైపోలేదు కద?'

'అబ్బే, అదేం లేదు సార్‌! ప్రజలింకా మత్తులోనే ఉన్నట్టున్నారు. నా బాధ అందుక్కాదు సార్‌. ఎగస్పార్టీవాళ్లంతా మిమ్మల్ని ఏకేస్తున్నారు సార్‌. ఒకాయన మిమ్మల్ని అవినీతి అనకొండ అంటున్నాడండి. మరొకాయన మిమ్మల్ని పట్టుకుని దొంగలముఠాకోర్‌ అంటున్నాడండి. బయటకి వెళ్తే ఈ మాటలన్నీ వినబడి మీ సెక్రట్రీగా సిగ్గుతో చితికిపోతున్నానండయ్య'

'ఓస్‌, ఆ మాత్రం దానికేనా ఇంత బెంబేలు పడిపోతున్నావ్‌? అయినా అన్నది నన్నయితే నిన్నన్నట్టు బాధపడతావేంటి?'

'వూరుకోండి సార్‌, మిమ్మల్ని అంటే- మీ దగ్గర పనిచేస్తున్న నన్ను అన్నట్టు కాదా చెప్పండి? ఇలాంటి మాటలు వింటుంటే ఛీ... వెధవ బతుకు, వెధవ బతుకు అనిపించి, గుండెలోతుల్లోంచి ఏడుపు ఎగదన్నుకుని వచ్చేస్తోందండి. మనిషన్నవాడు విని తట్టుకోగలిగే విమర్శలేనాండి అవి? ఏ మాత్రం హృదయం ఉన్నా కలుక్కుమనకుండా ఉంటుందా చెప్పండి? మనసనేది ఉంటే గింటే బతుకు మీదే అసహ్యం వేయదాండీ? ఏమాత్రం అభిమానం ఉన్నా బుర్ర భూమిలోకి కూరుకుపోదండీ? మన మీద తీవ్రమైన, సహేతుకమైన, ప్రాథమిక సాక్ష్యాధారాలతో కూడిన ఆరోపణలు వచ్చినప్పుడు అవి నిజంకాదని నిరూపణ అయ్యేవరకూ అన్నం నోటికి సహిస్తుందా చెప్పండి? రాత్రిళ్లు సుఖంగా నిద్ర పడుతుందా? అసలు మనస్ఫూర్తిగా నవ్వెలా వస్తుందండీ? ఇంట్లోవాళ్లకే మొహం చూపించలేకపోతామే, ఇక ప్రజల ముందు ఎలా నిలబడగలమండీ? అసలిలాంటి భావాలు కలగనివాడు మనిషేనంటారా?'

'ఆపెహె... ఎదవ ఏడుపూ నువ్వూను. ప్రపంచమంతా ఓదార్చగలుగుతున్నాను కానీ, నిన్ను మాత్రం వూరుకోబెట్టలేకపోతున్నాను. కొత్తగా పన్లోకి చేరావనీ, విశ్వాసం ఉన్నవాడివనీ తెలుసుకాబట్టి తమాయించుకున్నాను. అసలింతకీ నువ్వు బాధపడుతున్నావో, లేక నన్ను నానా మాటలూ అంటున్నావో తెలీటం లేదురా బాబూ! నీ అమాయకత్వంగూలా! రాజకీయాల్లో ఇవన్నీ సహజమే కదరా?'

'రాజకీయాల్లో విమర్శలు, ప్రతి విమర్శలు సహజమని నాకూ తెలుసండి. కానీ, వాళ్ల ఆరోపణల్లో కొన్ని విషయాలు మాత్రం ఎంతకూ మింగుడుపడటం లేదండి. నేనంటే కొత్తగా చేరాను కానీ, ఒకప్పుడు మీ ఆస్తులకు, ఇప్పటి మీ సంపదకు ఎక్కడైనా పొంతన ఉందాండీ? ఇప్పుడు మీ వ్యవహారాలన్నీ స్వయంగా చూస్తుంటే అబ్బో... నా బాసు ఇంత మహర్జాతకుడా అని ఓ పక్క ఆనందం కలుగుతూనే మరోపక్క వాళ్లంతా అంటున్నట్టు ఇంత కొద్దికాలంలో ఇన్నేసి కోట్లు, భవంతులు, ఫ్యాక్టరీలు, కంపెనీలు ఎలా సాధ్యమయ్యాయా అనే అనుమానం కలుగుతుంది కదండీ?'

'అంటే నేనేదో కిరికిరిలు చేశానని నిర్ణయానికి వచ్చేశావన్నమాట. అంతేనా?'

'అబ్బెబ్బే, నా నిర్ణయంతో పనేముందండీ? నేను మీ దగ్గర ఉద్యోగిని. కాబట్టి మీరెలాంటివారో నాకు ముందే తెలుసు కదండీ? కానీ, నా ఆలోచనలన్నీ జనానికి కూడా వస్తాయేమోనని బెంగండి. అప్పుడేంటండి తమరి గతని దిగులండి'

'వార్నీ తస్సదియ్యా! చంపుతున్నావురా, నీ అనుమానాలు, బెంగలు, ఏడుపుల్తోటి. వాళ్ల ఆరోపణలు సరే, మనం కూడా వాళ్ల మీద దుమ్మెత్తి పోస్తున్నాం కదరా, వూరుకుంటున్నామా?'

'అవుననుకోండి. కానీ, వాళ్లంతా తాజా సంగతుల మీద మాట్లాడుతుంటే మీరెప్పుడో దశాబ్దాల నాటి విషయాలు లేవనెత్తుతున్నారండి. మీ నాన్న సంగతి నాకు తెలుసులే అంటే, మీ ముత్తాత గురించి నాకూ తెలుసులే అని బూకరించినట్టుందండి మీ వ్యవహారం'

'రాజకీయాల్లో నిస్సిగ్గుగా నిలదొక్కుకోవాలంటే ఇలాంటి అడ్డగోలు, బురద జల్లుడు విద్యలన్నీ నేర్చుకోవాలి కదరా? నువ్వు తప్పు చేశావని ఎవరైనా అంటే, అడ్డుకోకపోవడం నీదే తప్పని వాదించెయ్యాలి. తెలిసిందా?'

'నిజమేనండి. కానీ బెయిలు మీద ఉన్నోడికీ, మెయిలు మీద ఉన్నోడికీ తేడా తెలియదేంటండి? పైగా దేశవిదేశాల నుంచీ తాఖీదులు వస్తుంటే ఎన్నాళ్లు కళ్లు కప్పగలమా అని బెంగండి'

'ఒరేయ్‌, నువ్వు నా సెక్రటరీవా, సీబీఐ ఏజెంటువా, ఎఫ్‌బీఐ గూఢచారివా?'

'భలేవారండి బాబూ! నాకంతటి సీనెక్కడిదండీ? మీ కాళ్ల దగ్గర పడి ఉండేవాడిని. ఈ ఆలోచనలన్నీ జనంలో ఏమాత్రం కలిగినా ఏం చేయాలో తోచక ఏడుస్తూ కూర్చున్నానండి'

'ఓరి నీ సందేహాలు దొంగలెత్తుకెళ్లా! జనం గురించి నువ్వు బెంగపడకు. నిజానికి నా మీద నాకున్న నమ్మకం కన్నా, ప్రజల అమాయకత్వం మీద ఉన్న నమ్మకమే నాకెక్కువ. మనం విందుభోజనం చేస్తున్నా, చేయి విదిలించిన మెతుకులు తిని సంబరపడే సామాన్యులు వాళ్లు. అందుకనే నాకంత దిలాసా, భరోసా, కులాసా... తెలుసా? నా చుట్టూ ఆరోపణలు, విమర్శలు, విచారణలు, రిమాండ్‌లు, కమాండ్‌లు, హైకమాండ్‌లు, కరెంటులు, వారెంటులు, జాయింటులు... అన్నీ చుట్టుముట్టున్నాయని నాకూ తెలుసు. అందుకే ఐసీయూలో రోగికి ఆక్సిజన్‌ ఎంత అవసరమో, నాకిప్పుడు అధికారం అంత అవసరం. అందుకోసమే నా తపన, నటన... అన్నీను. కాబట్టి మన జనం తెలివిమీరనంతవరకు నాకు, నా నీడన నీకు ఎలాంటి బెంగా అక్కర్లేదు. అర్థమైందా? ఇక కుదుటపడి ప్రచారం సంగతేంటో చూడు'

'ఆహా... ఇన్నేసి పన్లు చేసి కూడా ఎంత తెగింపు, ఎంత బరితెగింపు! నాకిక ఏ చింతా లేదండి'

PUBLISHED IN EENADU ON 26.04.2014

ప్రజాధన చోరాగ్రేసరుడు

'ఎవరండీ మీరు?'

'నేనొక సంఘం అధ్యక్షుడినండి. మిమ్మల్ని ప్రత్యేకంగా కలవడానికి వచ్చా'

'ఏ సంఘం అది?'

'అఖిలాంధ్ర దొంగ, దుండగ, దుర్జన, దగుల్బాజీ, నీచ, నికృష్ట, నయవంచక, అవినీతి, అక్రమార్కుల సంఘమండి. అఖిల భారత, అఖిల ప్రపంచ శాఖలకు అనుసంధానమండి'

'అద్సరే, కానీ నన్ను కలవడం ఎందుకు?'

'భలేవారండి బాబూ! మనకో సంఘం ఉంటే దాని భావజాలంతో అత్యంత సన్నిహిత సారూప్యం ఉన్న పెద్దమనుషులను కలుస్తుంటాం కదండీ? పైగా మీకు మేమంతా ఏకలవ్య శిష్యులమండి. మా కార్యాలయాల్లోను, మా ప్రతినిధుల ఇళ్లలోను మీ ఫొటో పెట్టుకున్నామండి. రోజూ తమరి మొహం చూసి కానీ మా వెధవ పనులను మొదలుపెట్టమండి. ఎప్పటి నుంచో మిమ్మల్నోసారి కలవాలనండి. ఇదిగో, ఇవాళ కుదిరిందండి'

'ఇంతకూ నాతో మీకేం పని?'

'ఇన్నాళ్లూ మేమేదో ఒక సంఘం పెట్టుకుని సభ్యుల సంక్షేమానికి ఏదో అరకొరగా కార్యక్రమాలు చేసుకుంటూ పోతున్నామండి. అసలిలాంటి సంఘం ఒకటి పెట్టి కడుపుకక్కుర్తితోనో, కడుపు మంటతోనో, ఎదగలేకో, ఎదిగే దారిలేకో, అవకాశాలు కనబడకో దారితప్పిన సహచరుల సాధకబాధకాలు పట్టించుకుని, వాళ్లు మరింత రాణించే తోడ్పాటు అందించాలనే ఆలోచన వచ్చినందుకు ఇంతకాలం నాలో నేను పొంగిపోయేవాడినండి. కానీ, నేనెంత అమాయకుడినో ఇప్పుడు అర్థమైందండి. ఎలాంటి సంఘం లేకుండానే మీరు మనలాంటివాళ్లను ఉన్నపళంగా ఉద్ధరించేశారండి. అందుకే నాకు, నా సంఘానికి, మా సభ్యులకు మీ ఆశీర్వచనాలు అందిస్తారని చక్కా వచ్చానండి'

'ఓ... అదా సంగతి! మీరు చెప్పిందంతా బాగుంది కానీ, దారి తప్పిన సహచరులనడమే నాకు నచ్చలేదు. అసలిదే సరైన దారి అయినప్పుడు ఇక తప్పడమేంటి?'

'ఆహా... ఓహో... చూశారా, ఎంత చక్కని పాయింటు లాగారో? నిజానికి నా ఉద్దేశం మనవాళ్లంతా సంఘం దృష్టిలో దారితప్పినవారేనండి. మన దృష్టిలో మనమే ఘనులమండి'

'సరిగ్గా చెప్పారు. ఇప్పుడు నాకు నచ్చారు. మరి నేనేదో ఉద్ధరించేశానని అంటున్నారు, అంత గొప్ప పనులు నేనేం చేశాను?'

'అమ్మమ్మ, ఏదో వినయం కొద్దీ తమరు అలా అంటున్నారు కానీ- తమంతటి వారు తమరేనండి! ఇంతకాలం మా సంఘ సభ్యులంతా ప్రజల సొమ్మును నేరుగా దోచుకుంటూ చట్టవ్యతిరేకులమనే ముద్ర వేయించుకున్నామండి. కానీ తమరు? దోచుకున్నది అదే ప్రజల సొత్తయినా, అదంతా చట్టబద్ధంగా సాగినట్టుగా భ్రమ కల్పించారండి. ఆ లెక్కన చూస్తే, మేమంతా ముసుగేసుకుని దొంగ పనులు చేస్తే, తమరు దొంగ పనులకే ముసుగేశారన్నమాటండి. నిజానికి అధికారం లేకుండానే తమరు ఇన్నేసి కోట్లను కొబ్బరి బొండంలో నీళ్లు తాగినట్టు పీల్చేశారంటే, అధికారం అంటూ మీకు అందింతే ఇంకెంతగా ఒలుచుకు తినేస్తారో, తలచుకుంటే ఒళ్లు పులకించి పోతోందండి'

'మీరు నా గురించి బాగానే తెలుసుకున్నారు కానీ, అంతా నేనొక్కడినే తిన్నట్లు చెప్పడం మాత్రం నచ్చలేదు'

'అబ్బెబ్బే, నేనింకా అక్కడి దాకా రాలేదండి. తమరెంత దయార్ద్ర హృదయులో నాకు తెలుసండి. మాలాంటివాళ్లెందరినో కోట్లకు పడగలెత్తించినవారు తమరేనండి. మీ చల్లని నీడలో చిన్నాచితకా దొంగలే కాదండి, బడాబడా చోరశిఖామణులూ పచ్చగా పచ్చనోట్లు పట్టేశారన్న నిజం దాచినా దాగనిది కాదా చెప్పండి? జాలిగుండెతో పాటు అపారమైన తెలివితేటలూ జతపడటం మీతోనే సాధ్యమైందండి'

'పొగడ్డానికి అంటున్నారా? నాకు పొగడ్తలంటే నచ్చదు. మీ మాటలకు ఆధారాలు చూపించగలరా?'

'ఇన్నేసి దగాకోరు పనులు చేసి కూడా పొగడ్తలంటే గిట్టకపోవడమనేది గొప్ప లక్షణం కాదండీ? ఇక మీ తెలివికి ఆధారాలు చూపిస్తా వినండి. ఇన్నేళ్లుగా మనరాష్ట్రంలో ఎందరెందరో అధికారం చలాయించారు. కానీ అసలిక్కడ ఇంతింతలేసి వనరులు ఉన్నాయని, వాటిని అడ్డం పెట్టుకుని ఇన్నేసి కోట్లు బయటికి లాగవచ్చనే ఆలోచన ఎవరికైనా వచ్చిందాండీ? ఏళ్ల తరబడి తవ్వుకున్నా తరగని కోట్లాది టన్నుల ఖనిజాలున్న గనులు, కొండలు, ప్రాంతాలు ఉన్నాయని ఎవరు కనిపెట్టారు చెప్పండి? వాటిని అయినవారికి లీజుకిచ్చి గలీజు పనులు చేయవచ్చని, అప్పగించి అప్పనంగా ఆర్జించవచ్చని, కట్టబెట్టి కట్టలు పోగేయవచ్చని, ధారాదత్తం చేసి దోచుకోవచ్చని, ఇచ్చినట్టే ఇచ్చి పుచ్చుకోవచ్చని ఎవరికి తట్టింది చెప్పండి? అలాగే జన సంక్షేమం కోసం పథక రచన చేసి స్వజన సంక్షేమం చేసుకోవచ్చని, ప్రజల పేరు చెప్పి పనులు మొదలుపెట్టి ఆ ప్రజలు కష్టపడి కట్టే పన్నుల సొత్తును ఖజానా నుంచి ఘరానాగా దారి మళ్ళించవచ్చని ఒక్కరు... ఒక్కరంటే ఒక్కరికైనా తోచిందా చెప్పండి?'

'బాగుందండీ... ఇంతకీ నేనేం చేయాలంటారు?'

'మాకు మార్గదర్శనం చేయాలండి. మా సంఘాన్ని విస్తృతం చేయాలండి. మాకు మద్దతు ఇవ్వాలండి'

'తప్పకుండా. నిజానికి అది నా కల. అందుకే ఇప్పుడు అధికారానికి నిచ్చెనలు వేస్తున్నాను. నాతో పాటు చేతులు కలిపి కోట్లు కొట్టేసి నాకు వాటాలిచ్చిన దొంగలు, దగుల్బాజీలు, దగాకోరులను కూడా బరిలోకి దింపి అధికార పీఠానికి దారులు వేస్తున్నాను. ఎందుకంటే అవినీతికి అధికారం ఆక్సిజను లాంటిది. అది అందగానే వచ్చి కనబడండి. మీ సంఘ సభ్యులందరినీ కూడా కలుపుకొని రాష్ట్రమంతటా ఒక అవినీతి చట్రాన్ని పరుద్దాం. అక్రమాలను వ్యవస్థీకృతం చేద్దాం. అకమ్రార్జనకు రహదారులు నిర్మిద్దాం. బడుగు దొంగలందరికీ పక్కా ఇళ్లు నిర్మిద్దాం. దుండగులందరూ తలెత్తుకుని, బోర విరుచుకుని నడిచేలా చేద్దాం. మన కార్యకలాపాలని దేశానికి, ప్రపంచానికి కూడా విస్తరిద్దాం. సరేనా?'

'ఆహా... ఎంత మంచి మాట సెలవిచ్చారు? చిత్తం!

PUBLISHED IN EENADU ON 22.04.2014