నేతలు... నీతులు!
'న...హ...మ...హ...స్కారం గురూగారూ!'
'ఏంట్రోయ్‌? అంతలా నవ్వుతా వత్తన్నావ్‌? నీమీద ఎవురైనా అవినీతి ఆరోపణలేవైనా సేసారా?'
'అదేంటండి అలాగనేశారు? అవినీతి ఆరోపణలు చేస్తే బాధపడతాం కానీ నవ్వుతామేంటండి...'
'వూరుకోరా... ఆరోపణలకి బాధపడేంత సత్తెవంతుడవుగాదని నాకు తెలుసులే. మహా అయితే, ఎలా తెల్సిపోయిందబ్బా అని ఆచ్చర్యపోతావ్‌, ఆనక ఎట్టా తిప్పికొట్టాలా అని దారులెతుకుతావ్‌ అంతేగా?'
'అయ్యా! మనిషిని కాక వాడి ఎక్స్‌రేని నేరుగా చూసే శక్తి మీ కళ్లకుందని మర్చిపోయి మాట్లాడాను. మన్నించండి. కానీ, ఆరోపణలకు, నవ్వులకు సంబంధమేమిటా అని తన్నుకు చస్తున్నా...'
'ఏముందిరా... ఇన్నేల్లుగా నాకాడ రాజకీయం నేర్సుకుంటున్నావు కాబట్టి ఇదో కొత్త పాటమనుకో. నువు సేసిన అవినీతి పన్లని పసిగట్టి ఆటినెవుడైనా బయటెడితే వూరికే మొగం కందగడ్డ లాగెట్టుకుని ఆవేశపడిపోకండా నీకు వత్తాసు పలికే వోల్లని పోగేసి, ఆల్లసేత పెత్రికలవోళ్లని పిలిపించి జోకులేయించాల. నిన్నటికి నిన్న కేంద్ర మంతిరి గోరిలాగన్నమాట...
'అంటే... కేంద్ర న్యాయశాఖ మంత్రి సల్మాన్‌ ఖుర్షీద్‌ మీద వచ్చిన ఆరోపణల గురించే కదండీ మీరు చెబుతున్నది. ఆయనగారు నడిపే వికలాంగుల ట్రస్టు ద్వారా 71 లక్షల రూపాయల మేర అవకతవకలు జరిగాయని విన్నానండి...'
'అదేరా మరి నీకూ నాకూ తేడా. నువ్విట్టాంటి యవ్వారాల గురించి తెలీగానే అవకాసమొత్తే ఎలా సేయాలో అంచనాకొత్తావు. నేనయితే అయి సెప్పే రాజకీయ పాటాలు ఏటాని ఆలోసిత్తాను...'
'అవున్సార్‌! అందుకే కదండీ, అడపాదడపా తమ దర్శనం చేసుకుంటుంట. మరిందులో పాఠం ఏంటండీ?'
'మరాయన్ని ఎనకేసుకొత్తా ఆయనగోరి సతీమణి, తోటి మంతిరిగోర్లు ఎట్టాంటి జోకులు పేల్చేరో కానుకోలేదా? పెల్లామంటే ఆవిడే మరి. ఆ కేజిరీవాల్‌ సెప్పేదంతా వట్టి జోకులని తేల్చేయలేదూ? ఆ మాటతో అవకతవకలన్నీ ఆసికాలైపోలేదూ? అంటే, ఎవుడైనా ఆరోపణలు సేసాడనుకో, అయ్యన్నీ కడుపుబ్బ నవ్వేసే కులాసా కబుర్లన్నట్టు సూడాలన్నమాట. కావాలంటే పెత్రికలోల్ల ముందు పగలబడి నవ్వేయాల. అప్పుడాల్లంతా బిత్తరపోయి సెప్పింది రాసుకుపోతారు. ఏటంటావ్‌?'
'అనేదేముందండి, ఇంతబాగా చెప్పాక! వెధవది ఇలాంటి ఆరోపణలు రోజుకోటి వస్తున్నాయండి. ఇంకా ఎలా ఎదుర్కోవాలో చెబుదురూ...'
'ఈ యవ్వారంలోనే ఆ కేంద్రమంతిరిగోరి తోటి మంతిరి ప్రెసాదవరమగోరు ఎంత బాగా సెలవిచ్చారో సూడలేదా? అన్నన్నన్నా... ఎంత మాట? కుర్సీద్‌గోరేంటీ, ఆయన తాహతేంటీ, కేవలం ముష్టి డెబ్బయ్యొక్క లచ్చలకి కక్కుర్తి పడతారా? ఎంత నామర్దా, ఎంత సిగ్గుసేటు? అదే ఏ డెబ్బయ్యొక్క కోట్లో అయితే ఆలోసించాలిగానీ... అంటూ రెచ్చిపోలేదూ?'
'అవునండోయ్‌. స్వయానా మరో కేంద్రమంత్రి అయి ఉండీ, ఆయనిలా మాట్లాడ్డం తప్పు కదండి? కావాలంటే కాదనాలి కానీ ఇదేం వాదనండి...'
'వార్నీ! నువ్వేదో కాసింతో, కూసింతో ఎదిగుంటావులే అనే బ్రమలో ఉన్నారా ఇన్నాల్లూనూ. ఇప్పుడు తెలత్తాంది, నీకింకా రాజకీయం ఒంటబట్టలేదని. రాజకీయాల్లో సమర్దింపులు, బుకాయింపులు, తిప్పికొట్టడాలు, తిట్టడాలు, మొండికెత్తడాలే ఉంటాయి కానీ తప్పుల గురించి తల్లడిల్లడాలుండవు. ఇలా అడపాదడపా రాజకీయ ముసుగులోంచి బయటికొచ్చేసి, నికార్సయిన మనిసిలా ఆలోసించావనుకో ఎప్పుడోపాలి పెద్ద దెబ్బ తింటావు మరి...'
'బుద్ధొచ్చిందండి బాబూ తిట్టకండి. అయినా కానీ ఈ రోజుల్లో అవినీతంటే కోట్లకు కోట్లు గుర్తొస్తున్నాయికానీ వెధవది ఈ లక్షలేంటండి? అసలిలాంటి ఆరోపణల్ని ప్రజలు కూడా పట్టించుకుంటారా అని నా అనుమానమండి...'
'ఏడిశావ్‌లే! పెజానీకాన్నెప్పుడూ తేలిగ్గా సూడమాక. ఓటు ముద్దర్లప్పుడు ఓటి కుండలా మిగిలిపోతావ్‌. మన సూపంతా ఆల్ల మాటల్ని తేలికసేయడం మీదే ఉండాల. కానయితే ఇందులో అవినీతినిబట్టి కొన్ని బిరుదులు, అవార్డులు గట్రా నేతలకివ్వచ్చేమోనని తడుతోందిరా. ఉదారనకి పెద్ద పదవిలో ఉండి కేవలం లచ్చల్లో నొక్కేసాడని తెలీగానే 'వట్టి అమాయక సెక్రవర్తి' అనో, 'పిచ్చిమాలోకం' అనో పేరెట్టచ్చేమో. ఉన్న నేతల్లో అందరికన్నా తక్కువ తిన్నోడే నీతున్నోడని జనం జేజేలు పలికే రోజులొత్తాయేమో మరి. మన నాయకుల యవ్వారాలు సూత్తే అట్టాగే ఉన్నాయి మరి. ఏటంటావ్‌?'
'అద్భుతం సార్‌! మీ శిష్యుడిగా అలాంటి నేతల్లో ఒకడిగా ఎదగాలనేదే నా ఆకాంక్ష. అందుకు మీ ఆశీర్వచనం కావాలి'
'ఆటికేంలే... అయ్యెప్పుడూ ఉంటాయి కానీ, నువుసేసె యదవపన్ల ఇలువ ఇలువ కోటికి తగ్గితే మాత్రం నిన్ను గుమ్మం ఎక్కనీయన్రో... అది కానుకుని మసలుకో. ఇక పోయిరా మరి!'
PUBLISHED IN EENADU ON 19.10.2012
కామెంట్‌లు లేవు:
కామెంట్‌ను పోస్ట్ చేయండి