గురువారం, ఏప్రిల్ 13, 2023

నయవంచక నేతోపదేశం!


 

అధినేత ఇలా హాళ్లోకి వచ్చాడో లేదో, ఒకతను చటుక్కున వచ్చి పెద్ద దండ వేసి కాళ్లకి దణ్ణం పెట్టాడు.

''తమరు కాదనకూడదు. ఇవాళ పేపర్లో తమరి ఫొటో చూసి పులకించిపోయాం. ఆ పళంగా తమరికి సన్మానం చేయాలని చక్కా వచ్చేశాం. ముందుగా తమరి అనుమతి తీసుకోలేకపోయాం. మన్నించాలి...'' అన్నాడు వినయంతో తడిసి ముద్దయిపోతూ.  అతడితో వచ్చిన వాళ్లంతా చేతులు కట్టుకుని నుంచుని ఉన్నారు.

అధినేతకేం అర్థం కాలేదు. ఈ లోగా సెక్రటరీ వచ్చి, ''అక్కడికీ నేను చెబుతూనే ఉన్నానండి. ఇలా అకస్మాత్తుగా వస్తే కుదరదూ, అయ్యగారు బోలెడంత ప్రజాసేవా గట్రా చేయాలీ, అస్సలు తీరికుండదూ అనేసేసి. కానీ వీళ్లు వినలేదండి. తమరి అభిమానులమంటూ బిలబిలలాడుతూ లోపలికి దూరిపోయారండి. వాళ్లకి తమ మీద ఉన్న ప్రేమ చూసి కాదనలేకపోయానండి...'' అంటూ వివరణ ఇచ్చుకున్నాడు.

అధినేత కాస్త కుదుటపడి, ''ఉన్నట్టుండి నాకు సన్మానమేంటయ్యా. నేనేం సాధించానని?'' అన్నాడు నిదానంగా.

దండేసినతడు అందుకున్నాడు.

''ఆహా... ఎంత నిరాడంబరం? ఎంత వినయం? దేశం మొత్తం మీద తమరేంటో మార్మోగిపోతోందండి. అందరి అధినేతల్లోకీ ఇప్పుడు తమరేనంట కదా అత్యంత ధనవంతులు? మిగతా అందరు అధినేతల ఆస్తులన్నీ కలిపినా తమదేనంటగా పై చెయ్యి? అసలందరిదీ కలపిన సంపదలో తమరొక్కరిదే సగానికి పైగా ఉందంట కదండీ? మరిందెంత ఘనమైన విషయమండీ? పేపర్లో చదివి పులకించిపోయామంటూ నమ్మండి. అందుకే తమరి దర్శనం చేసుకుందామని వచ్చామండి. మా యందు దయుంచి మాకు మార్గదర్శనం చేయాలండి...'' అంటూ ఏకరువు పెట్టాడు.

అప్పటికి సంగతేంటో అర్థమైంది అధినేతకి. ''ఓ అదా సంగతి? అద్సరే కానీ, ఇంతకీ మీరంతా ఎవరు?'' అన్నాడు ముసిముసిగా నవ్వుతూ.

''మేమంతా తమరి ఏకలవ్య శిష్యులమండి. తమకి అధికారం లేని కాలం నుంచీ మిమ్మల్ని గమనిస్తూ, మీ గురించి వార్తలు చదువుతూ, తమరి విన్యాసాలు చూస్తూ, ఎప్పటికైనా తమరి అడుగుజాడల్లో నడవాలని తహతహలాడిపోతుంటామండి... ఏదో మా పరిధిలో కాస్తో కూస్తో వెధవ పనులు చేసుకుంటూ కాలక్షేపం చేస్తున్నామండి. మా వాళ్లని పరిచయం చేస్తనుండండి. ఇదిగో... ఈడు లేడండీ, జనానికి టోకరా వేసి బతుకుతుంటాడండి. ఆడు ప్రజల్ని నమ్మించి మోసం చేస్తుంటాడండి. ఈడు మాయ చేసి దోచుకుంటాడండి. ఆడు దగా చేసి సంపాదిస్తాడండి. కానీ మేమంతా తమరి కాలిగోటికి కూడా సరిపోమండి. అందుకే మేం చేసే సన్మానాన్ని కాదనడానికి వీల్లేదండి...'' అంటూ దండ వేసినతడు కాళ్లావేళ్లా పడసాగాడు.

అధినేత అలవోకగా సెక్రటరీ కేసి చూసి, ''ఈళ్లు తెగ మొహమాట పెట్టేస్తున్నారయ్యా. నాది చూస్తే జాలి గుండె. గబుక్కుని కాదనలేను. మరి చుట్టు పక్కల మీడియా వాళ్లెవరూ లేరు కదా?'' అన్నాడు.

''అబ్బే లేరండి. మన పత్రికలోల్లే ఉన్నారండి. ఆళ్లెలాగూ తమకి చూపించే వార్త రాస్తారు కాబట్టి పరవాలేదండి...''

''మరి ప్రజలు కానీ, ప్రతిపక్షాలోళ్లు కానీ లేకుండా చూసుకున్నావా?''

''ఆ జాగ్రత్తలన్నీ తీసుకున్నానండి. హాలు తలుపులు బిడాయించేసి బయట మన పోలీసోళ్ల చేత కాపలా పెట్టించానండి. అయ్యగారు అత్యవసర రహస్య సమాలోచనలో ఉన్నారూ, కాసేపటి వరకు పరిపాలనా అదీ చేయరూ అని చెప్పేశానండి. ఇహ తమరు నిస్సంకోచంగా వీళ్ల సన్మానం అందుకుని నిజాలు చెప్పి మార్గదర్శనం చేయొచ్చండి...''

వచ్చిన వాళ్లంతా అప్పటికప్పుడు చకచకా ఏర్పాట్లు చేసేశారు. ఓ పెద్ద కుర్చీలో అధినేతని కూర్చోబెట్టి, అందరూ నేల మీద చతికిల పడ్డారు. ఆపై ఒకొక్కరూ వచ్చి దండలు, శాలువాలు, బుకేలు ఇస్తూ తమకి తోచినది మాట్లాడసాగారు.

మొదటగా ఒక వ్యక్తి గొంతు సవరించుకున్నాడు.

''ముందుగా శ్రీవారి గురించి ఓ చిన్న కవిత'' అంటూ అందుకున్నాడు.

''ఎవ్వారి తరమౌను ఈ వెధవ పనులు...

అవని నేరములందు అన్నిటను మిన్న...

అసురులైన ఈ తీరు అందుటను సున్న...

అన్నన్న... ఇది కదా అకృత్యమన్న!''

అంటూ అధినేత మెడలో దండ వేసి మాట్లాడసాగాడు.

''సాటి దుండగులారా! సహచర నీచులారా! నేడు మనకి సుదినం. మనమంతా చిన్నా చితకా వెధవ పనులు చేస్తూ కాలం గడుపుతున్నవాళ్లం. దాంతో అందరం ఎంతో కొంత చెడ్డవాళ్లమని సమాజంలో ముద్ర పడినవాళ్లమే. కానీ ఈయన? మనందరం చేసే రకరకాల నీచపు పనులను ఒకేసారి, ఏక గుత్తంగా, దర్జాగా చేస్తూ కూడా పైకి మంచిగా కనిపిస్తున్న నయా నయవంచక చక్రవర్తి. మనమంతా మన పరిధిలో కొందరికి టోపీ వేయగలం. కానీ ఈయన రాష్ట్రంలోని ప్రజలందరికీ ఒకే సారి టోపీ వేసి టోకుగా, హోల్సేలుగా, గుంపగుత్తగా దోచుకుంటున్నారు. ఈయన విధానాలను నేర్చుకోడానికి మనం ఎన్ని జన్మలెత్తాలో అర్థం కాకుండా ఉంది'' అంటూ అధినేత కాళ్లకి దండం పెట్టి వెళ్లి కూర్చున్నాడు.

ఆ తర్వాత మరో దుండగుడు వచ్చి అధినేతకి పుష్పగుచ్ఛం అందించి మాట్లాడసాగాడు.

''చేత చిన్న ముద్ద చూపించి బులిపించి..

ప్రజలను నమ్మించి, ఓట్లు పట్టి...

సందిట తాయిలాలు... సిరి దోచు పథకాలు...

కరకు నేతా! నిన్ను చేరి కొలుతు!!''

అంటూ చిన్నప్పుడు నేర్చుకున్న పద్యాన్ని మార్చి పాడగానే చప్పట్లు మార్మోగాయి.

''నిజానికి మనమంతా ఈయన ముందు ఒట్టి చవట దద్దమ్మలకిందే లెక్క. ఎందుకంటే మనం ఏ వెధవ పని చేసినా భయం భయంగా చేస్తాం. అవే వెధవ పనులను ఈయన దర్జాగా చేస్తారు. మనం మన దొంగ పనులన్నీ రాత్రులు, రహస్యంగా  చేస్తుంటాం. అదే ఈయన పట్టపగలు బాహాటంగా  చేస్తుంటారు. మనం బయటకి వెళ్తే చాలు, పోలీసులు వెతుకుతుంటారు. కానీ ఈయన బయటకి వెళ్తే అదే పోలీసులు సెక్యూరిటీగా వుంటారు. మన నేరం బయట పడితే చట్ట ప్రకారం శిక్ష అనుభవిస్తాం. అదే ఈయన మాత్రం ఆ చట్టానికే ఎదురు తిరుగుతారు. ఆ చట్టం తన పని తాను చేసుకుని పోకుండా చట్టంలోని లొసుగులనే అడ్డం వేసి కేసుల్ని సాగదీస్తూ దర్జాగా పదవిలో కొనసాగుతారు. మనలాగా ఈయన కూడా ప్రజలని అడ్డంగా దోచుకుంటున్నా కూడా, పైకి మాత్రం ప్రజల కోసమే తన జీవితమన్నట్టు కలరింగు ఇస్తారు. ఒకప్పుడు ఇంటిని తాకట్టు పెట్టే స్థితి నుంచి ఈనాడు దేశంలోని అధినేతలందరిలోకీ అత్యంత ధనవంతుడుగా పేరు తెచ్చుకున్న ఈయన అఖండమైన తెలివితేటల గురించి ఎంత చెప్పినా అది తక్కువే'' అంటూ తన్మయత్వానికి లోనై కళ్లొత్తుకుంటూ వెళ్లి కూర్చున్నాడు.

ఆ తర్వాత మొదట్లో దండేసిన వ్యక్తి లేచి అధినేతకి శాలువా కప్పి ''నేనొక సన్మాన పత్రం రాయించుకొచ్చాను. అది చదువుతాను'' అంటూ గొంతు సవరించుకున్నాడు.

''అగణిత అక్రమ వక్ర మార్గ వైతాళికా!

 ద్విగుణీకృత దుశ్చరిత్ర దురంధరా!

చండ ప్రచండ నీచకృత్య నిర్నిరోధా!

నయవంచక నయా విధాన రూపకల్పా!

జన పీడిత జయ విధాన జగజ్జేతా!

జయము... జయము...'' అనగానే అందరూ ఆనందంగా ఈలలు వేసి గోల చేశారు.

''ఆగండాగండి. మనం ఇలా ఎంత సేపు ఈయన్ని పొగిడినా మన తనివి తీరదు. మన అభిమాన ప్రదర్శనకి ఎన్ని రోజులైనా సరిపోదు. కాబట్టి ఇంతటితో ఆపుదాం. ఇప్పుడు మనందరం మరిన్ని నీచ నికృష్ట పనులు దొరక్కుండా ఎలా చేయాలో, ఎలాంటి నైపుణ్యాలు అలవరచుకోవాలో మన అభిమాన అధినేతలుంగారిని వేడుకుందాం. మీరంతా నిశ్శబ్దంగా ఉంటే ఆయన మనకి నాలుగు చెడ్డ మాటలు బోధిస్తారు. శ్రద్ధగా విని మరింతగా చెడిపోవాలని కోరుకుంటున్నాను'' అంటూ కూర్చున్నాడు.

అధినేత తన మెడలో ఉన్న దండలన్నీ పక్కన పెట్టి, శాలువాలన్నీ కుప్పగా పోసి, బుకేలన్నీ రాసిగా పడేసి లేచి నుంచుని ముసిముసిగా నవ్వుతూ గొంతు సవరించుకున్నాడు.

''మీ అందరి అభిమానం చూస్తుంటే ఆనందంగా ఉంది. అయితే మీరెంత వెర్రిబాగులోళ్లో నాకు అర్థమైంది. ఎందుకంటే ఇవాళ దేశంలోని అధినేతలందరికంటే నేను అత్యంత ధనవంతుడినని పేపర్లో వచ్చినందకు మీరు మురిసిపోతున్నారు. ఒక విధంగా అది గర్వకారణమే అయినా అదంతా ఎన్నికల సమయంలో నా అంతట నేను దాఖలు చేసిన అఫిడవెట్లోని అంశాలే.  నేను అధికారింగా ప్రకటించిన దీనికే మీరు ఇంతగా ఉబ్బితబ్బిబ్బయిపోతున్నారంటే... మీ అమాయకత్వానికి జాలేస్తోంది. మనలో మన మాటగా చెబుతున్నాను. నేను అనధికారింగా దోచుకున్న, వెనకేసిన, పోగు చేసిన సంపదెంతో ఒక విధంగా నాకే లెక్కకు అందదు. దాన్ని మీరు ఊహించను కూడా లేరు. ఎందుకంటే మీరంతా  ముందుచూపు లేని మామాలు, సాదాసీదా నేరగాళ్లు. నేనలా కాదు. రానున్న కొనేళ్ల పాటు నిరాటంకంగా, నిరంతరాయంగా, నిర్భయంగా, నిశ్చింతగా కోట్లకు కోట్లు దోచుకోడానికి పథక రచన చేసిన రాజకీయ వేత్తను. అన్నింటికన్నీ పెద్ద సంపద ప్రజా ధనం. దాన్ని దోచుకోవాలంటే అధికారం ఉండాలి. దాని కోసమే నేను కిందా మీదా పడ్డాను. తపన పడ్డాను. ఊళ్ల మీద పడ్డాను. అధికారం అందాలంటే ముందుగా ప్రజల్ని నమ్మించాలి. అందుకోసమే నేను పాదయాత్రలు చేశాను. ప్రజలు ఏడవకపోయినా ఓదార్చాను. అవ్వా, తాతా, చెల్లీ, తల్లీ... అంటూ వరసలు కలిపాను. బుగ్గలు నిమిరాను. బుర్రలు ముద్దు పెట్టుకున్నాను. ఆఖరికి అనుకున్నది సాధించాను. ఇప్పుడు అనుచరుల నుంచి అధికారుల వరకు అందరికీ అవినీతిని రుచి చూపించాను. నన్ను నమ్ముకున్న వాళ్లకి భూములు, సెజ్లు, పోర్టులు అప్పగించి అందుకు ప్రతిగా వాటాలు అందుకున్నాను. వ్యవస్థలన్నీ గుప్పెట్లో పెట్టుకున్నాను. ఎదురు తిరిగిన వారికి బెదురు పుట్టేలా చేస్తున్నాను. ఆఖరికి జనం కూడా తమ సమస్యల గురించి చెప్పుకోడానికి సైతం భయపడేలా చేస్తున్నాను. ఇక ప్రతిపక్షం వారికి నిలువ నీడ లేకుండా చేస్తున్నాను. ఏ పని తలపెట్టినా సామాన్యుల కోసమేనంటూ చెబుతాను. ఆ పనికి సంబంధించిన కాంట్రాక్టులన్నీ నాకు అనుకూలంగా ఉండేవారికే కట్టబెడుతున్నాను. రాష్ట్రంలో అపార మైన ప్రజా సంపద ఉంది. దాన్ని దోచుకోడానికి ఒకసారి అధికారం అందితే సరిపోదు. మళ్లీ మళ్లీ దాన్ని అందుకోవాలి. అందుకోసమే నా తపనంతా. తిరిగి అధికారాన్ని అందుకోడానికి ఎందుకైనా సిద్ధపడతాను. ఈ ప్రజలు ఒట్టి వెర్రిబాగులోళ్లు.  వాళ్ల కళ్ల ముందు మనం కోట్లు కొల్లగొడుతున్నా పట్టించుకోరు. మనం దోచుకునే దాంట్లో ఏ అరశాతమో, అందులో సగమో పడేస్తే సంబరిపడిపోతారు. పైగా అంతకు పదింతలు పన్నులు, ఛార్జీలు, సెస్సులంటూ పిండుకున్నా తెలుసుకోలేరు. అదే నా ధీమా. కాబట్టి మీరు కూడా ఎలాగోలా రాజకీయాల్లోకి రావడానికి ప్రయత్నించండి. అప్పుడిక ఎలాంటి భయం లేకుండా బాహాటంగానే దోచుకోవచ్చు. మీరు చేసిన సన్మానానికి ప్రతిగా వచ్చే ఎన్నికల్లో మీకు ఏదో ఒక స్థాయిలో టికెట్ఖరారు చేసి అవకాశం కలిగిస్తాను. ఈలోగా మీరు ప్రజలకు మాయ మాటలు చెప్పి, అసాధ్యమైనా సరే ఏవో రకరకాల హామీలు ఇచ్చి నమ్మించడానికి ప్రయత్నిస్తూ ఉండండి. అందుకోసం నా ప్రసంగాల వీడియోలు చూస్తూ ఉండండి. ఇదే నేను చెప్పే నయవంచక నేతోపదేశం'' అన్నాడు.

ఆ మాటలకు అక్కడకొచ్చిన దొంగ, దుష్ట,దౌర్జన్య, దోపిడీ, దుండగ, దగుల్బాజీ, దగాకోరులంతా తన్మయత్నంతో కింద పడి పొర్లసాగారు!

-సృజన

PUBLISHED ON 13.4.2023 ON JANASENA WEBSITE

బుధవారం, ఏప్రిల్ 12, 2023

సామాన్యుడి విశ్వరూపం!

 


''ఓం సామాన్యాయనమః

అసామాన్యాయనమః
అనన్య సామాన్యాయనమః
అమాయకాయనమః
ఓటు హస్తాయనమః
నోటు ప్రియాయనమః
చుక్కమాలక్ష్మి చోదకాయనమః
ప్రలోభ ప్రభావాయనమః
ఉత్తిత్తి హామీ ఉన్మత్తామనమః
మాయ మాటల మానసోల్లాసాయనమః''
... అధినేత గొంతు హాలంతా మార్మోగుతుండగా సెక్రటరీ ఆశ్చర్యంగా లోపలికి అడుగుపెట్టాడు. అక్కడ నిలువెత్తున ఓ ఫొటో ఉంది. అందులో గోచీ పెట్టుకున్న ఓ సామాన్యుడి చిత్రం ఉంది. అమాయకంగా నవ్వుతున్న అతడి చేతిలో ఓటు ముద్ర కనిపిస్తోంది. రెండు చెవుల్లో పువ్వులు అలంకరించి ఉన్నాయి. ఆ ఫొటో ముందు ఓటు యంత్రం, దాని మీద ఓ పువ్వు ఉన్నాయి. అధినేత కుర్చీలో కూర్చుని బిగ్గరగా మంత్రాలు చదువుతూ పువ్వులు విసురుతున్నాడు. సెక్రటరీకి ఈ హడావుడంతా ఏంటో అర్థం కాలేదు. నెమ్మదిగా దగ్గరకు వెళ్లి తాను వచ్చినట్టు తెలియడం కోసం చిన్నగా దగ్గాడు. అధినేత తలతిప్పి నిశ్శబ్దం అన్నట్టు సైగ చేసి పూజ కొనసాగించాడు.
''ఓం నిరుపేదాయనమః మద్యం సమర్పయామి
ఓం జీర్ణవస్త్రాయనమః ధనం సమర్పయామి
ఓం క్షుద్బాధ పీడితాయనమః కోడిపలావు సమర్పయామి
ఓం అధికార ప్రదాయకాయనమః సకల ఉపచారాన్‌ సమర్పయామి''
అంటూ అధినేత గంట వాయించి హారతిచ్చి నమస్కారం చేసి లేచి నిలబడ్డాడు. సెక్రటరీ కూడా లేని భక్తి నటించి హారతి కళ్లకద్దుకుని నమస్కారం చేసి ప్రశ్నార్థకంగా చూస్తూ నిలబడ్డాడు.
అధినేత నవ్వేసి, ''ఈ తతంగమంతా చూసి బెంబేలు పడ్డావేంటయ్యా సెక్రట్రీ? మరేం లేదయ్యా, ఎన్నికలొస్తున్నాయి కదా, సామాన్యుడిని ప్రసన్నం చేసుకుందామని రహస్యంగా ఉపచార పూజలు చేస్తున్నాను. ఓ జాతకాలాయన చెప్పాడులే... పూజ బాగుందా?''
అప్పటికి సెక్రటరీ తేరుకున్నాడు. విషయం అర్థమై విషయంలోకి వచ్చేశాడు.
''ఆహా... సామాన్యుడంటే తమకెంత భక్తి, ఎంత భయం, ఎంత శ్రద్ధ!'' అంటూ తన్మయత్వం అభినయించాడు.
''కాదుటయ్యా మరి? విష్ణుమూర్తుల వారి వేలికి సుదర్శన చక్రం ఉన్నట్టు, ఈడి వేలి కొసన ఓటుందయ్యా. ఆ వేలుతో ఏ పార్టీ మీట మీద నొక్కుతాడోనని లోలోపల బెంగుంది. అందుకేనన్నమాట...'' అన్నాడు అధినేత అర్థోక్తిగా.
సెక్రటరీ కొద్దిగా తటపటాయించినా, ''ఉపచారాలు బాగున్నాయి కానీ సార్‌, మనం చేసేవన్నీ అపచారాలే కదండీ... మరివన్నీ ఫలిస్తాయంటారా?'' అన్నాడు ఉన్నదున్నట్టు.
అధినేత పగలబడి నవ్వేశాడు.
''చూడు సెక్రట్రీ. ఆడి దగ్గర ఓటుంటే, మన కాడ నోటుంది. దాన్ని చూసేసరికి ఆడి మనసు వశం తప్పుద్ది. సీసా ఒకటి చేతిలో పెట్టామనుకో. దాని వాసనకి ఆడి కళ్లు బైర్లు కమ్ముతాయి. పూటుగా తాగించి, నోటు చేతికిచ్చి, బిర్యానీ పొట్లం సమర్పించామనుకో ఆ మత్తులో ఆడు మన గుర్తు మీద నొక్కేస్తాడు. ఎంత పెద్ద ఆల్సేషియన్‌ డాగ్‌ అయినా బిస్కెట్టు పడేస్తే తోకూపుతుంది చూడు... అట్టాగన్నమాట. ఎన్ని ఎన్నికల్లో చూడ్డం లేదూ?'' అన్నాడు చిద్విలాసంగా.
అధినేత అతిధీమా చూసి సెక్రటరీ ఆశ్చర్యపోయాడు. ''అవుననుకోండి. కానీ తమరు చేసిన అపచారాల ముందు ఈ ఉపచారాలు ఫలిస్తాయా అని?''
''నిజమేననుకో. కానీ తప్పదయ్యా. అధికారం అందేంత వరకు చక్రం తిప్పలేం. అందాక తిప్పకుండా ఉండలేం. కుర్చీ ఎక్కక ముందు కాలికి బలపం కట్టుకుని ఊరూవాడా తిరుగుతూ, నోటికొచ్చిన నానా కూతలు కూస్తాం. అదిగో స్వర్ణయుగం అంటాం. ఇదిగో స్వర్గం అంటాం. తప్పదు. వాళ్ల కోసమే ఏడుస్తాం. వాళ్లనే ఓదారుస్తాం. అవన్నీ జరిగేవి కావని నీకూ తెలుసు, నాకూ తెలుసు. వెర్రి జనం మాత్రం నమ్మేస్తారు. తెగ ఆశపడిపోయి ఓట్లు గుద్దేస్తారు. మనం అలాగే కదా అందలమెక్కింది? మరి అందక అందక అధికారం అందాక, పిచ్చి ప్రజలకు సేవ చూస్తూ కూచుంటే, ఇక మనకేంటి దక్కేది? దీపముండగానే ఇల్లు చక్కదిద్దుకోవాలని తెలియంది కాదు కదా, ఏమంటావ్‌?''
''ఏమంటానండీ, తమరింత పచ్చిగా చెబుతుంటేనూ? అందుకు తగినట్టుగానే సాగిందిలెండి తమరి పాలన. కానీ ఏమాటకామాటే చెప్పుకోవాలి. ఓ పక్క అడ్డంగా దోచుకుతింటూ కూడా మనసంతా సామాన్యుడేనన్నట్టు భలే మసిబూసి మారేడుకాయ చేశారు లెండి. ఓ పక్క మీటలు నొక్కుతూ జనం ఖాతాల్లోకి ధనం జమ చేసినట్టు చేసి, మరో పక్క వాళ్లకి తెలియకుండానే అంతకు పదింతలు వెనక్కి తిరిగొచ్చేలా పన్నాగాలు పన్నారు. రోడ్డు సెస్సులనీ, చెత్త పన్నులనీ, అదనపు ఛార్జీలనీ జనం జేబులు పిండేశారు. ఇసుక నుంచి కాసులు కురిపించారు. మద్యం నుంచి మనీ రప్పించారు. గనుల ద్వారా గల్లా నింపుకున్నారు. అంతా బాగేనే ఉంది కానీండి... సామాన్యులు నాలుగేళ్ల నాటికన్నా బాగా తెలివిమీరారేమోనని అనుమానమండి...''
''ఆ సందేహం నీకెందుకు కలిగింది?''
''ఏముందండీ? ప్రజల సమస్యలన్నీ నెత్తి మీద వేసుకుని జనాన్ని చైతన్యం చేస్తున్నాడు చూడండీ, ఆడి సభలకు జనం విరగబడుతున్నారండి. ఆడేం మాట్టాడినా ఈలలూ, చప్పట్లూనండి. ఆడేం పిలుపిచ్చినా వెనకా ముందూ చూడకుండా ఉరుకుతున్నారండి. పైగా ఆడు తమరి బండారం విప్పి చెప్పేస్తున్నాడండి. తమరు, తమరి అనుచరులు కలిసి ఎక్కడెక్కడ ఎంత నొక్కేస్తున్నారో, తమరు పైకి సామాన్యుడి జపం చేస్తూనే, లోలోపల బరితెగించి ఆళ్ల బతుకులు ఎంతలా పీల్చి పిప్పి చేస్తున్నారో, ఏ ప్రాజెక్టు పేరు చెప్పి ఎంత నొక్కేస్తున్నారో, ఏ పథకం వెనుక ఎంత భోంచేస్తున్నరో, రాష్ట్రాన్ని ఎలా భ్రష్టు పట్టిస్తున్నారో మొత్తం అరటి పండు ఒలిచి పెట్టినట్టు వివరించేస్తున్నాడండి. అవన్నీ సామాన్యుడి బుర్రలోకి దూరితే ఇక తమకి మరోసారి కుర్చీ ఎక్కే అవకాశం ఉండదనే అనిపిస్తోందండి...''
సెక్రటరీ భయాలకి అధినేత తేలిగ్గా నవ్వేశాడు. ''మరందుకే కదయ్యా... ఆడి సభలకు చోటుచ్చిన ఊళ్ల మీదకి క్రేన్లు, బుల్డోజర్లూ నడిపిస్తున్నాం. మనం ఉస్కో అంటే చాలు ఉరికే పోలీసు కుక్కల్ని ఉసిగొల్పుతున్నాం. అక్రమ కేసులు పెట్టిస్తున్నాం. మన రౌడీల్ని కూడా పంపించి దౌర్జన్యం చేయిస్తున్నాం. దాంతో జనం బిక్కచచ్చిపోవడం లేదూ? ఆడి సభలకు వెళ్లొచ్చిన జనం పేర్లను రేషన్‌ కార్డుల జాబితా నుంచీ, పథకాల జాబితా నుంచీ పీకి పారేస్తున్నాం. అదే కాదయ్యా... ఆళ్ల సభల్ని మాత్రం సాగనిస్తున్నామా? అనుమతులివ్వకుండా ఏడిపించడం లేదూ? లేనిపోని ఆంక్షలు పెట్టి రాపాడించడం లేదూ? సమయానికి ట్రాఫిక్కు మళ్లింపులు చేయడం లేదూ? కరెంటు కూడా కట్‌ చేయడం లేదూ? పోలీసుల్ని, మన గూండాల్ని ఎక్కడికక్కడ కాపలా పెట్టి దార్లు మూయించేయడం లేదూ? జనాన్ని చెదరగొట్టడం లేదూ? అలా ఈ పాటికి మనమేంటో, మన పవరేంటో, మన పగేంటో, కసేంటో తెలిసే ఉంటుందిలేవయ్యా...''
సెక్రటరీ ఊరుకోలేదు. ''మరక్కడే ఉందండి అసలు సంగతి. ఇవన్నీ తమరు అధికారాన్ని ఉపయోగించి ప్రయోగిస్తున్నారండి. కానీ అవే మీ నిజ స్వరూపం ఏంటో సామాన్యులకు చెబుతున్నాయండి. జనం అన్నీ గమనిస్తారు కదండీ. ఆనక అవకాశం వచ్చినప్పుడు వేరే మీటలు నొక్కుతారేమోనని నా భయమండి...''
సెక్రటరీ మాటలకి అధినేత పగలబడి నవ్వేశాడు.
''ఓరెర్రి సెక్రట్రీ! నా పవరేంటో, నా పొగరేంటో, నా విరగబాటేంటో నీకింకా అర్థమయినట్టు లేదయ్యా. అధికారం తలకెక్కిన వాడిని దాన్ని నిలబెట్టుకోవడమెలాగో తెలియదంటావా? అవడానికిది ప్రజాస్వామ్యమే అయినా ఏలుతున్నది ధనస్వామ్యమయ్యా. అధికార స్వామ్యం. అదే నా దగ్గరున్న బ్రహ్మాస్త్రం. దాన్ని ఎక్కడెలా ప్రయోగించాలో నాకు తెలుసు. అవసరమైతే మీటలు నొక్కే యంత్రాలను కూడా శాసించగలను. రిగ్గింగు చేయించగలను. బూత్‌ కేప్చరింగ్‌ చేయించగలను. దొంగ ఓట్లు గుద్దించగలను. ఊళ్లకు ఊళ్లు స్వాధీనం చేసుకుని మన గూండాలు, రౌడీల చేత మీటలు నొక్కించగలను. డబ్బు, సారా పంచడమే కాదయ్యా, అవసరమైతే బాంబులు, కత్తులు, కటార్లు కూడా ప్రయోగించగలను. జనం ఇళ్లలో ఉండగానే ఆళ్ల ఓట్లు మాత్రం నాకే పడేలా చేసుకోగలను. పైకి సామాన్యుడి పూజ చేస్తున్నాను కదాని వెర్రిబాగుల వాడిననుకున్నావా?''
ఇంతలో సామాన్యుడి ఫొటో లోంచి ''హ...హ్హ...హ్హ...హ్హా!'' అంటూ బిగ్గరగా ఓ పెద్ద నవ్వు వినిపించసాగింది. అధినేత, సెక్రటరీ బిత్తరపోయి చూస్తుండగానే ఓ పెద్ద వెలుగు కనిపించింది. ఆ వెలుగులోంచి సామాన్యుడి విశ్వరూపం విస్తరించింది. ఆ సామాన్యుడికి అనేక తలలు ఉన్నాయి. అనేక చేతులు ఉన్నాయి. ఆ చేతుల్లో కత్తి, సుత్తి, డాలు, గునపం, నాగలి, పలుగు, పార, తట్ట, బుట్ట లాంటి ఎన్నో పరికరాలు ఉన్నాయి.
''ఓరోరీ నీచ నికృష్ట రాజకీయ నరాధమా! అక్రమ విన్యాసాల అధమాధమా! అవినీతి కార్యకలాప అప్రాచ్య స్వరూపమా! పయోముఖ విషకుంభమా! గోముఖ వ్యాఘ్రమా! నీ దురంహంకార, దుష్ట, దౌర్జన్య, దుర్నీతి వ్యవహారాలు నాకు తెలియవనుకున్నావా మూర్ఖుడా? నువ్వు పూజలు చేసినంత మాత్రాన నేను ప్రసన్నుడనవుతాననుకున్నావా? ఉపచారాల మాటున నువ్వు చేసే అపచారాలు అర్థం చేసుకోలేననుకున్నావా? కులాల పేరిట నువ్వు సాగించే కుతంత్రాలు తెలియవనుకున్నావా? మతం పేరుతో నువ్వు చేసే మాయ తెలుసుకోలేననుకున్నావా? అన్ని వృత్తుల వారినీ అతలాకుతలం చేసిన నీ దుష్పరిపాలన విధానాలు అవగతం కాలేదనుకున్నావా? నేనెవరనుకున్నావు? సామాన్యుడిలో వెల్లువెత్తిన వ్యతిరేకతకి మారు రూపాన్ని! ప్రజల్లో పెల్లుబికిన జనచైతన్య స్వరూపాన్ని! మేలుకున్న జాగృతిని! నీ నీచ స్వరూపాన్ని గ్రహించిన సామాన్యుడి విశ్వరూపాన్ని! ఇక నీ మాయలు, మంత్రాలు, భ్రమలు, హామీలు, ప్రచారాలు నన్నేమీ చేయలేవు! నీలాంటి నీచ నేతలకు ఎలా బుద్ధి చెప్పాలో నాకు తెలుసు!''
ఆ సామాన్యుడి విశ్వరూపం పలికిన పలుకులు విని అధినేత, సెక్రటరీ వెంటనే కళ్లు తిరిగి స్పృహ తప్పి పడిపోయారు.
                                                                                                                              -సృజన
PUBLISHED ON 12.4.2023 ON JANASENA WEBSITE