అవును... మెదడు మాట్లాడుతోంది. కావాలంటే మీ కణాలను అడగండి. మీ శరీరంలోని ప్రతి కణం మీ మెదడు మాటలు వింటోంది. లేకపోతే మీ మెదడు కేవలం ఓ ఆలోచనల పుట్ట అనుకుంటున్నారా? అబ్బే... అది చాలా శక్తిమంతమైన చికిత్సాలయం. ఓ మందుల దుకాణం కూడా. మన మెదడుకి, శరీరానికి విడదీయరాని బంధం ఉంది. మన మెదడులో పుట్టే ప్రతి ఆలోచన మన శరీరంపై ప్రభావం చూపిస్తుంది. మన మానసిక స్థితి మన శరీర రక్షణ వ్యవస్థను నియంత్రించడమే కాదు, మన కణాల మరమ్మత్తు కూడా చేపడుతుందని సైన్స్ పదే పదే చెబుతూనే ఉంది. ఒత్తిడితో కూడిన ఆలోచనలు అవే రకమైన హార్మోన్లను విడుదల చేసి ఆరోగ్యాన్ని పాడు చేస్తాయి. అదే శాంతమైన, సకారాత్మకమైన ఆలోచనలు శరీరం కోలుకోడానికి, ఆరోగ్యకరంగా ఉండడానికి దోహదపడతాయి. అంటే మన ఆలోచనలు, భావోద్వేగాలు చక్కగా ఉండేలా చూసుకుంటే మన శరీరంలో రసాయనిక వ్యవస్థ కూడా బాగుపడి దీర్ఘకాల ఆరోగ్యం మెరుగవుతుంది. శరీరానికి సహజంగానే ఉండే రక్షణ వ్యవస్థను మరింత మెరుగుపరచడంలో మన ఆలోచనలే అత్యంత కీలకమని మరోసారి నిరూపణ అయింది. మరింకేం? అనవసరంగా ఎక్కువగా ఆలోచించకుండా ప్రశాంతంగా ఉండండి. జీవితం అదే బాగుంటుంది.
కామెంట్‌లు లేవు:
కామెంట్‌ను పోస్ట్ చేయండి