పరాజయ పాఠాలు

'నమస్కారం గురూగారూ'
'రారోయ్‌ రా! ఏంటీ చాలా కాలమైంది. మొహం అలా వేలాడేసుకుని ఉన్నావేం?'

'మీకు తెలియనిదేముంది గురూగారూ! ఫలితాలు గూబ గుయ్యిమనిపించాయి. పరువు, పవరు కూడా పరారయ్యాయి. అత్త తిట్టినందుకు ఏడవాలో, ఆడపడుచు నవ్వినందుకు ఏడవాలో తెలియని పరిస్థితిలో పడ్డా. ఎవరికీ మొహం చూపించలేక యాత్రలకు పోయి వచ్చా'

'అంతేలేరా, లోకం తీరే అంత. కానీ, అలా బెంబేలు పడిపోయి మొహం దాచేసుకుంటే ఎలారా?'

'ఇంకేం చేయమంటారు చెప్పండి. సిగ్గుతో చితికిపోయాననుకోండి. పైగా ప్రచారంలో రెచ్చిపోయి మరీ, కుర్చీ నాదేనన్నట్టు ఎడాపెడా వాగేశాను కదండీ? దాంతో అద్దంలో కూడా నా మొహం నేనే చూసుకోలేకపోయానంటే నమ్మండి'

'వార్నీ, ఆత్రగాడికి బుద్ధి మట్టం అన్నట్టు, నా దగ్గర రాజకీయ పాఠాలు పూర్తిగా నేర్చుకోరా ఆ తరవాత కాస్తో కూస్తో అనుభవం ఏడిశాక బరిలోకి దిగచ్చునంటే వినకుండా, మహా నేతలాగా పోజెట్టి దూకేశావు. బొక్కబోర్లా పడ్డావు. కుర్చీ ఏక్కేద్దామన్న దురదేగానీ, ఎక్కేందుకు దమ్ముందో లేదో చూసుకోలేదు మరి. ఏం చేస్తాం...'

'ఏంటి గురూగారూ మీరు కూడానూ. చచ్చిన పామును ఇంకా ఎందుకండీ చంపడం? ఇప్పుడేం చేయాలో చెప్పుదురూ'

'సర్లేరా, నీ అరకొర బుద్ధితో వేసిన గెలుపు సూత్రాలు బెడిసికొట్టినా, పరాజయ పర్వంలో పాఠాలు బోలెడున్నాయి. అవైనా ఒంటపట్టించుకో మరి'

'పరాజయంలో పాఠాలేముంటాయండీ, మీది మరీ చోద్యం కాకపోతేనూ?'

'ఓరమాయకుడా, రాజకీయం అంటే అదేరా! సమకాలీన నేతల్ని చూసైనా నేర్చుకునే తెలివిడి ఏడ్వాలి. గెలిచినోడు ఎంత సందడిగా మీటింగులు గట్రా పెడతాడో, అంతకంటే హడావుడిగా నువ్వు మీటింగులు పెట్టుకోవాలి'

'ఓడినోడికి మీటింగులేంటండీ?'

'ఎందుకుండవురా... చతికిల పడ్డానికి కారణాలు విశ్లేషించుకుంటున్నట్టు కనబడాలి. ప్రజలు ఛీ కొట్టడమే ఏకైక కారణమని నీకు తెలిసినా, ఏవేవో కారణాలు వెతికి మైకుల ముందు పళ్లికిలిస్తూ చెప్పాలి'

'మరి ఎలాంటి కారణాలు చెప్పాలండీ?'

'ఓడిన నేతల్ని గమనించలేదురా? గెలిచినోడు ప్రజల్ని హామీల మత్తులో ముంచేశాడని వాగొచ్చు. ఆ హామీలని జనం పాపం... అమాయకంగా నమ్మడంవల్లే వాళ్ల గెలుపు సాధ్యమైందని వదరచ్చు. వాళ్లు చెప్పినవేమీ చేయలేరని, ఆ సంగతి ప్రజానీకానికి నిలకడ మీద తెలుస్తుందని బోర విరుచుకుని మరీ మాట్లాడొచ్చు. దీన్ని నిస్సిగ్గు నిబ్బరమంటారు'

'కానీ గురూగారూ, ప్రచారంలో నేను కూడా అడ్డదిడ్డమైన హామీలిచ్చా కదండీ? నా మాటలు విని జనం నవ్వుకోరాండీ?'

'ఒరే జనానికన్నీ తెలుసురా. కానీ, వాళ్లు నవ్వుకుంటారని, ఏదేదో అనుకుంటారనీ నువ్వనుకుంటే ఎలారా? నీకేదో గొప్ప చిత్తశుద్ధి గట్రా ఉన్నట్టు బిల్డప్పులివ్వద్దూ? అంచేత నువ్విచ్చిన హామీలే నికార్సయినవన్నట్టు, అవతలివాళ్లవి వట్టి డొల్ల మాటలన్నట్టు నోటికొచ్చినట్టు పేలడమే. ఈ విద్యను ఒంటపట్టించుకోడానికి కావలసిన అర్హతలన్నీ ఇప్పుడు నీలో ఉన్నాయి మరి'

'ఆహా... ఓడినవాడిలో కూడా ఆత్మవిశ్వాసాన్ని పెంచుతారు గురూగారూ మీరు'

'ఏడిశావ్‌లే... ఆత్మవిశ్వాసం లాంటి మంచి పదాలెందుకు? మనలో మాటగా అనుకోవాలంటే ఇది ఆత్మవంచననుకోవాలి'

'అర్థమైంది గురూగారూ! మనం ఓడించినా ఇతడు పాపం మన గురించే ఆలోచిస్తున్నాడని ప్రజలు జాలిపడేలా మాట్లాడాలన్నమాట'

'జనం అలా జాలి పడతారనేది వట్టి భ్రమేనని నీకు తెలిసినా, నువ్వు మాత్రం గెలిచినా ఓడినా నీ మనసంతా ప్రజల కోసమే దిగులు పడుతున్నట్టు పైకి కనిపించాలి. కాబట్టి లోలోపల నీ మనసు భగభగలాడిపోతున్నా, పైకి మాత్రం వినయంగా మొహంపెట్టి ప్రజల తీర్పును గౌరవిస్తున్నట్టు సెలవీయాలి. అసలింతగా జనం నువ్వంటే కుతకుతలాడిపోతున్నట్టు ఫలితాలనుబట్టి తెలిసినా, నువ్వు మాత్రం మెత్తగా మాట్లాడుతూ ప్రజల వ్యతిరేకతను ముందుగా గమనించలేకపోయామని నమ్రత చూపించాలి. నిజానికి వినయం, నమ్రత నీ ఒంటికి సరిపడవనుకో... కానీ అవన్నీ నీలో ఉన్నట్టు సాధ్యమైనంత భ్రమ కల్పించడానికి ఎక్కడలేని కృషీ చేయాలి. అర్థమైందా?'

'బాగా తెలిసిందండి. ఇక మీదట నేనేం చేయాలో కూడా సెలవిద్దురూ'

'ఇక నీకెలాగూ చేయడానికి ఏమీ లేదు కాబట్టి, గెలిచినోడు ఏం చేసినా అందులో తప్పు పట్టాలి. మంచి చేసినా అందులో చెడు వెతకాలి. ఆడు ఏం మాట్లాడినా దానికి లేనిపోని దురుద్దేశాలు అంటగట్టాలి. ఏ పథకం పెట్టినా బొక్కలెతకాలి. లేనిపోని లెక్కలు, నిజాలు తీసి మసి పూసి మారేడుకాయ చేసి ఏకడానికి ఎలాంటి వీలు దొరుకుతుందా అని ఎదురు చూస్తున్నట్టు రెచ్చిపోవాలి... తెలిసిందా?'

'బ్రహ్మాండంగానండి. కానీ గురూగారూ, జనం నమ్ముతారంటారా?'

'ఓరెర్రోడా... నిన్ను జనం నమ్మితే ఓడేవోడివే కాదు కదరా, ఆ సంగతి నీకేల? ప్రస్తుతం నువ్వున్న పరిస్థితుల్లో ఇంతకు మించి చేయడానికేం లేదు మరి'

'అర్థమైంది గురూగారూ! ఇక రెచ్చిపోతా చూడండి'

PUBLISHED IN EENADU ON 27/06/2014

ఇలాగైతే కష్టమే!

'ఎంత దారుణం?'

'వట్టి దారుణమా, మహా ఘోరం!'

'ఎన్నడైనా కనీవినీ ఎరుగుదుమా?'

'పిదప కాలం... పిదప బుద్ధులూను'

'అసలివన్నీ బాగుపడే లక్షణాలేనా అని!'

'ఒంటిమీద స్పృహ ఉండే మాట్లాడుతున్నారా?'

'అబ్బే, ఏదో సంధికాలం మాటల్లా ఉన్నాయి'

- ఆ హాలులో సమావేశమైన అందరూ తలో మాటా అంటున్నారు. అందరి ముఖాల్లోనూ విషాదం తాండవిస్తోంది. ఒకడు నెత్తిన చెంగేసుకుని కూర్చుంటే, మరొకడు ముక్కుకు తువ్వాలు అడ్డుపెట్టుకుని విచారంగా ఉన్నాడు. వాళ్లందరి నిట్టూర్పులతో గది నిండిపోయింది. ఇంతలో ఒకడు కిటికీ తలుపు తీశాడు. బయట పచ్చని మొక్కల నుంచి రివ్వుమంటూ చల్లని గాలి చొచ్చుకొచ్చింది. నులివెచ్చని సూర్యకిరణాలతో గది నిండిపోయింది.

'ఆ తలుపేసేయవయ్యా. తాజా గాలి వచ్చేస్తుంది. కాలుష్యం తప్ప పీల్చుకోగలమా మనం?' అని ఓ పెద్దాయన కేకలేశాడు.

'మరే... మరే... మర్చిపోయాస్మండీ. సువాసనలు, తూరుపు వెలుతురు మన ఒంటికి సరిపోవు కదా?' అని నాలుక్కరుచుకుంటూ వాడు తలుపు మూసేశాడు.

'ఛ...ఛ... అలగా జనాన్ని అందలం ఎక్కిస్తే ఇదిగో... ఇలాగే ఏడుస్తుంది. ఎక్కడో టీ అమ్ముకునేవాణ్ని, రైలు బోగీలు తుడుచుకునేవాణ్ని, దేశదిమ్మరిని తీసుకొచ్చి అధికార పీఠం మీద కూర్చోబెడితే ఇదే ప్రమాదం'

'కాదా మరి? ఆ పాటికి ఆయనొక్కడే రాజకీయాల్ని ప్రక్షాళన చేసెయ్యడానికి వచ్చినట్టు ఏమిటండీ ఆ మాటలు? వింటుంటే ఒళ్లంతా కంపరం ఎక్కిపోతోంది. మంత్రులందరూ ఏటా ఆస్తుల్ని ప్రకటించాలట? మంత్రుల బంధువులెవరికీ వ్యాపారాలు ఉండకూడదట. అయినవాళ్లెవరూ ప్రభుత్వ ఆస్తులు పొందకూడదట. ఏమిటండీ ఈ నిబంధనలు? ఇహ... ఆ పాటికి మంత్రి పదవులెందుకంట? నాలుక గీసుకోవడానికి కూడా పనికొస్తాయా అని? ఇలాటి పద్ధతులతో రాజకీయాల్ని భ్రష్టుపట్టిస్తే రాబోయే కాలంలో మనలాంటి నీచ నేతలు ఎలా బతకాలి చెప్పండి?'

'ఏమండీ మీరు చెప్పండి! ఇలాంటి సూత్రాలు కానీ పాటించి ఉంటే మీరు ఇన్నేసి కోట్లు సంపాదించేవారా అని? మూడు నాలుగేళ్లలో మీ బంధుజనమంతా ప్రభుత్వ భూముల్ని ఎకరాలకు ఎకరాలు గుత్తకు తీసుకోలేదాండీ? అహ... మీ చుట్టాల్లో, అయినవారిలో, దూరపు బంధువుల్లో ఒక్కరంటే ఒక్కరు అణగారి ఉన్నారా? అసలు మీరెంత దోచారో తేల్చుకోవడానికి ఈ దర్యాప్తు సంఘాలకు ఎన్ని ఏళ్లు పడుతుందో ఎవరైనా లెక్క చెప్పగలరాంట? ఇప్పుడు వీరొచ్చి పెడ పాలనకు పగ్గాలు వేస్తానంటారా? ఈయన తినడు... మరొకర్ని తిననివ్వడు. ఇదేం సిద్ధాంతమంట?'

'బాగా చెప్పారు. అధికారం అంటే ఏంటండీ అసలు? మన చుట్టూ ఉన్నవాళ్లకు ఇంత తినిపించి, మనం అంతకంత భోంచేయాలి కానీ- నోరు కట్టేసుకోండంటే ఎలా? ఈ లెక్కన మనం తిండి, తిప్పలు లేకుండా ప్రజాసేవ చేయాలన్నమాట. పోనీ చేసినా మాత్రం పదవులు శాశ్వతం అంటారా? ఇవాళ పవర్‌లో ఉంటే, రేపు పవర్‌కట్‌లో పడతాం. దీపం ఉండగానే ఇల్లు చక్కబెట్టుకోవాలనే ఇంగితమైనా ఏడ్చిందా అని!'

'అది సరేనండీ బాబూ... సంపన్నుల కోసం కాకుండా పేదల కోసం నేతలంతా పనిచేయాలట! పేదల్ని, పేదరికాన్ని నిర్మూలించేస్తే ఇక ఎవరికి చేస్తాడట ఈయన సేవ? పేదల కోసం పని చేయాలంటున్నాడు కదా, మరి అలా చేయడానికైనా పేదలు మిగిలి ఉండాలా అక్కర్లేదా చెప్పమనండి. పేదజనాన్ని అలా చెప్పుకింద తేలులా తొక్కిపెట్టి ఉంచకపోతే- రేప్పొద్దున్న ఎవరి కోసం పథకాలు పెడతాం? ప్రజాధనాన్ని దోచుకోవాలంటే పథకాలు ఉండాలా అక్కర్లేదా? మరి ఆ పథకాలు పెట్టాలంటే పేదలు లేకపోతే ఎలా? ఇలా అధికారాన్నంతా ఉపయోగించేసి ఈయనగారు దేశంలో పేదలనేవాళ్లు లేకుండా చేసేస్తాడేమోనని తెగ భయంగా ఉంది... ఓ రాత్రి వేళ దేశమంతా అభివృద్ధి సాధించేసినట్టు, పేదలు రైతులు సామాన్యులు కళకళలాడుతూ తిరుగుతున్నట్టు పీడకలలు వచ్చేస్తున్నాయండీ బాబూ. ఇక నిద్రపడితే ఒట్టు!'

'అసలు దేశంలోనే కుంభకోణాలు లేకుండా చేద్దామంటాడే. ఇదెక్కడి కోణమండీ? అసలు ఏ కోణంలో ఆలోచిస్తున్నాడో అర్థం కాకుండా ఉంది. అవినీతికి ఆస్కారం లేకపోతే, సంపాదనకు వీలు కాకపోతే, బంధుజనాన్ని ఉద్ధరించలేకపోతే, మన భావి తరాలను తిని కూర్చోగలిగేలా చేయలేకపోతే, నల్లధనాన్ని విదేశాలు దాటించలేకపోతే, చట్టాలతో ఆడుకుని చుట్టాలకు మేలు చేయలేకపోతే... ఇక ఈ రాజకీయాలెందుకంట, అధికారం ఎందుకంట? హాయిగా ఏ హిమాలయాల్లోకో పోయి ముక్కు మూసుకుని తపస్సు చేసుకుంటే సరి!'

-ఇలా అందరూ తలో రకంగా తమ కసిని, ద్వేషాన్ని, కోపాన్ని వెలిగక్కుతుంటే ఓ పెద్దాయన లేచాడు.

'ఒరేయ్‌... ఆగండ్రా. మనలో మనం మనసు విప్పి మాట్లాడుకోవాలంటే- మనమంతా నీచాతి నీచులం! ప్రజల్ని మభ్యపెట్టి అధికారంలోకి వచ్చి దాన్ని అడ్డంపెట్టుకుని అవినీతి అక్రమాలకు పాల్పడినవాళ్లం. కానీ, మనందరం ఒక విషయంలో మాత్రం ఉమ్మడిగా విఫలమయ్యాం. ఇంతమందిమి ఉన్నాం, ఎందుకు? ఒక్కరంటే ఒక్కరం ప్రజాచైతన్యాన్ని గమనించలేకపోయాం. అదేగనుక సకాలంలో తెలుసుకుని ఉంటే కొన్నాళ్లు మేత మానేసైనా జాతి సంగతి ఆలోచించి తిరిగి మభ్యపెట్టే ప్రయత్నాలు చేసేవాళ్లం. చేతులు కాలాక ఆకులు పట్టుకుని ఏం లాభం? ప్రజల చేతిలో ఓడిపోయి దిగాలు పడ్డాం. ఇక జరగాల్సింది ఏమిటో గ్రహించండి. మనం చేసిన నికృష్ట పనులే అవినీతి కేసులై మనల్ని చుట్టుకోబోతున్నాయి. అవి మనల్ని కాటేయకముందే మనం దోచుకున్నదంతా ఏం చేయాలో ఆలోచించండి. అది మానేసి మోడీనో, బాబునో తిట్టుకుంటూ కూర్చుంటే ఒరిగేదేముంటుంది? కాబట్టి ఎవరి జాగ్రత్తలు వారు తీసుకోండి. ఇక పొండి!'

PUBLISHED IN EENADU ON 17/06/2014

నవ రాగాలు

ఎన్నికల ఫలితాలు వచ్చిన సంబరంలో యువతీ యువకులు కేరింతలు కొడుతూ ఒక చోట చేరారు. ఓటు హక్కు వినియోగించుకుని, అవినీతికి వ్యతిరేకంగా నవతరం తీర్పునిచ్చి ఆ ఫలితాలను ఆస్వాదిస్తున్న వాళ్లంతా సంబరాలు చేసుకుంటున్నారు.

'ఇప్పుడు అందరం సరదాగా తలా ఒక పాట పాడాలి...' అన్నాడో సరదాల కుర్రాడు.

'అయితే ఓ షరతు. అన్నీ పేరడీ పాటలే పాడాలి...' అందో కిలకిలల కన్నెపిల్ల. అందరూ సరేనంటే సరేననుకున్నారు.

ఆ రాగాల సరాగాలు ఇలా సాగాయి.

* * *

'ఎందుకొచ్చిన ఎన్నిక

ఓ అవినీతి బాలకా!

గెలవడమంటే తేలికా?

జైలుకి పదమ్మా చాలిక!'

అన్నాడో తుంటరి. అంతా కిసుక్కున నవ్వారు.

తరవాత వంతు అందుకున్నాడొక యువకుడు

'కారులో కటకటాలకెళ్లే

కరుకు బుగ్గల కటికవాడా!

కొల్లగొట్టిన కోట్ల సొమ్ము

ఎలా వచ్చెనో చెప్పగలవా?' అంటూ నవ్వేశాడు. ఇంతలో పక్కనున్నవాడు అందుకుని

'కడుపు కాలే కష్టజీవులు

కూలికెళ్లి పన్నులు కడితే...

వాళ్ల సొత్తును అక్రమంగా

మింగినావు తెలుసుకో!'

అందరూ చప్పట్లు కొట్టారు.

ఒకమ్మాయి గొంతు సవరించుకుంది-

'అండా దండా ఉంటాడని

మీ నాన్న మాటకు అండనిస్తే

గుండె లేని మనిషల్లే...

కొండా కోనలు కాటేశాడా?

అప్పనంగా... దోచి...

మహ గొప్పలు నీవు చెప్పుకొంటే

వస్తుందమ్మా ఒక రోజు...

అక్రమాలకు జైలు ఆ రోజు!' అంది రాగయుక్తంగా. కుర్రాళ్లంతా వంత పాడుతూ కేరింతలు కొట్టారు.

మరో అమ్మాయి లేచి సన్నని గొంతుకతో ఇలా పాడింది

'ఇది కుట్రల కాలమనీ... తప్పుల తరుణమనీ

తొందరపడి ఓ కాకిపిల్ల ముందే కూసింది...

విందులు చేసింది

ఇక కసిరే కేసులు కాల్చునని

మరి ముసిరే తప్పులు తరుమునని

ఎరుగని కాకిపిల్ల ఎగిరింది

విరిగిన రెక్కల ఒరిగింది

నేలకు కూలింది...' అనగానే నవ్వులు మిన్నంటాయి.

ఇంతలో ఓ బండకళ్లద్దాల బుల్లోడొకడు లేచాడు

'బాబూ వినరా

తండ్రీ కొడుకుల కథ ఒకటి

కలతలు ఉన్న కమ్మని సీమలో

సాగించారు కుతంత్రాల కాపురం...' అనగానే అందరూ ఫకాలుమని నవ్వారు.

ఇంతలో ఓ అమ్మాయి లేచి నిలబడి స్టెప్పులు వేస్తూ మొదలెట్టిందో పాట

'డిఫెక్ట్‌గాడే బలే డిఫెక్ట్‌గాడే...

కటకటాలకు కనెక్ట్‌ అయితే...

డిస్కనెక్ట్‌ కాడే...!' అనేసరికి పకపకలు మిన్నంటాయి.

మరో కుర్రాడు లేచి అందుకున్నాడు

'ఎవడు వాడు? ఎచటి వాడు?

ఇటు వచ్చిన కంత్రీగాడు...

ప్రజల ధనం జనుల ధనం

దోచుకునే దొంగవాడు

భూమి ధనం గనుల ధనం

కబళించే దుండగీడు

తగిన శాస్తి చేయరా... ఆ...ఆ...ఆ...

తరిమి తరిమి కొట్టరా' అంటూ పాడుతుంటే కుర్రాళ్లంతా కోరస్‌ పాడి రక్తి కట్టించారు.

ఇంతలో ఓ యువకుడు అలనాటి ఓ అందాల నటుడిని అనుకరిస్తూ ఓ చేత్తో కాలర్‌ పట్టుకుని మరో చేతి చూపుడు వేలు పైకెత్తి పాడసాగాడు...

'ఎవరి కోసం ఎవరి కోసం

ఈ దోపిడీ పర్వం? ఈ అవినీతి సర్వం?

ఎవరి కోసం... ఎవరి కోసం...

పథకాల భిక్ష నువ్వే పెట్టి

పేదల ఆశలు కొల్లగొట్టి

భూములన్ని చుట్టబెట్టి జనుల జెల్ల కొట్టావు

బతుకు నీకు ఇచ్చాము...

ఉతికి ఉతికి దోచావు...'

అనేసరికి అందరూ పగలబడి నవ్వసాగారు.

ఇంతలో ఓ పెద్దాయన అటుకేసి ముసిముసిగా నవ్వుతూ వచ్చారు. 'సరేలెండర్రా... పోయిన అవినీతి సంగతి వదిలేసి ఇప్పుడు వచ్చిన కొత్త శకం గురించి కూడా పాడండి మరి' అన్నారు.

యువతరమంతా ఒక చోట చేరి కోరస్‌గా అందుకున్నారు

'అదిగో నవలోకం... విరిసే మన కోసం' అంటూ పాడారు.

'ఉందిలే మంచి లోకం ముందుముందున

అందరూ సుఖపడాలి నందనందన' అంటూ కేరింతలు కొడుతూ ఆనందించారు!

PUBLISHED IN EENADU ON 19/05/2014

అదీ అసలు సంగతి!

'ఏంటయ్యా సెక్రట్రీ... బయటేంటి కోలాహలం?' 

'ఎక్కడెక్కడి నుంచో చాలామంది తమ దర్శనానికి వచ్చారండి' 

'ఎవరు వాళ్లు?' 

'అదే అడిగానండి. అందరూ తమ తమ వృత్తి వ్యాపారాలేమిటో చెప్పారండి' 

'ఏమని చెప్పారు?'

'వాళ్లలో కొందరు దొంగలండి. మరి కొందరు దోపిడిదారులండి. కొందరు హత్యలు కూడా చేసిన వాళ్లున్నారండి. ఇంకా అవినీతిపరులు, అక్రమ వ్యాపారులు, కోర్టు కేసుల్లో నిందితులు, బెయిల్‌ మీద ఉన్నవాళ్లు, లంచగొండులు అంటూ చెప్పుకొచ్చారండి' 

'ఏంటిట సంగతి?' 

'మిమ్మల్ని కలుస్తామంటే ఠాఠ్‌... వీల్లేదని కేకలేశానండి. మరి ఇట్లాంటి దగుల్బాజీలు వచ్చారంటే మీకెంత అప్రతిష్ఠ, ఎంత నామర్దా అనండి. అయితే వాళ్లు వినలేదండి. నువ్వెళ్లి మేమెవరో అయ్యగారికి చెప్పూ, ఆయనకు అర్థమవుతుందిలే... నువ్వెవడివో కొత్తోడిలా ఉన్నావని హాల్లో కూర్చుండిపోయారండి. మరి పోలీసుల్ని పిలిపించి బయటికి గెంటెయ్యమంటారా?' 

'భలేవాడివయ్యా సెక్రట్రీ! నీకింకా కొన్ని విషయాలు బోధపడినట్టు లేదు. వాళ్లంతా మనకు కావలసిన వాళ్లేలే. త్వరలో అధికారంలోకి రాబోతున్నామనే అభిప్రాయంతో పరాకు లేకుండా పేర్లు చెప్పుకొని పోదామని వచ్చుంటారు' 

'అయ్యా... ఇలాంటివాళ్లతో మీరు కలిసి మాట్లాడితే అంతగా బాగుండదేమోనండి. సెక్రట్రీగా నా బాధ్యత గుర్తొచ్చి చెబుతున్నాను. ఆనక మీ ఇష్టం' 

'ఓరోరి... వెర్రి సెక్రట్రీ! మనం ఎదిగిందే ఇలాంటివాళ్ల అండదండలతోరా! వాళ్లందరూ వేర్వేరుగా చేసిన పనులన్నీ మనం ఒక్కళ్లమే ఎడాపెడా చేసేసి ఈ దశకొచ్చాం కదా? పులకరించిపోయి పలకరించడానికి వచ్చుంటారు. పద మాట్లాడదాం. అన్నట్టు... వాళ్లందరికీ కూల్‌డ్రింకులు పంపించు'

* * *

'దండాలండయ్య. తమరు పెద్ద మనసు సేసుకుని తమ దర్శనం కలిగించడమే మా అందరి పున్నెమండి. ఈల్లంతా తమర్ని దగ్గరగా సూడాలని, కుదిరితే ఒక్కసారి తాకాలని తెగ సంబరపడిపోతుంటే నేనే దగ్గరుండి తీసుకొచ్చానండి' 

'మీ అభిమానం సరేకానీ, ఇలా అందరూ ఒకేసారి వచ్చేస్తే ఎలాగయ్యా? మీడియా చూ స్తే కోడై కూయదూ?' 

'ఆ... మీడియాదేముంది లెండయ్య. ఎన్నిసార్లు తమరి లీలల గురించి రాయలేదూ? అది కోడై కూస్తే తమరు సూత్తా వూరుకుంటారా? పామై బుసకొట్టడం లేదూ. పత్రికల్లో తమరి కుంభకోణాలు, అక్రమార్జనలు, అవినీతి లావాదేవీలు, లోపాయకారీ యవ్వారాలు, దోపిడిలు, హవాలా పనులు... ఇవన్నీ చూసినప్పుడల్లా మేమంతా ఉబ్బితబ్బిబ్బైపోతామండి. అందుకనే అందరం కూడబలుక్కుని బయల్దేరి వచ్చామండి. తమరు మా యందు దయుంచాలి' 

'సర్లెండయ్యా, అధికారం అందనీయండి. ఇక మనందరికీ స్వర్ణయుగమే. ప్రజాపథకాలు పెట్టి వాటికి లబ్దిదారులుగా అర్హుల్ని పక్కనపెట్టి మిమ్మల్నే ఎంపిక చేయిస్తా. ప్రాజెక్టులు మొదలుపెట్టి అసలైన టెండర్లను నిరాకరించి మీకే కాంట్రాక్టులు ఇప్పిస్తా. మీరే పనీ చేయకపోయినా అంచనాలు పెంచేసి బిల్లులు పాస్‌ చేయిస్తా. పరిశ్రమలకని చెప్పి రైతుల నుంచి భూములు వూడలాక్కుని మీకే ఇప్పిస్తా. ఎంచక్కా రియల్‌ఎస్టేటు వ్యాపారం చేసుకుందురు గాని. ఇలా చిన్న చితక పనుల నుంచి పెద్ద పెద్ద గనుల దాకా అందరం కలిసి దోచుకుందాం. సరేనా? ఇక పోయిరండి...' 

'దండాలయ్య... ఇక ఉంటామండి'

* * *

'ఏం సెక్రట్రీ, ఇప్పుడర్థమైందా మన సంగతేంటో?' 

'అబ్బో... అద్భుతంగానండి. ఇంతలేసి పెద్దమనుషులొస్తే గ్రహించుకోలేకపోయాను క్షమించండి' 

'పర్లేదు లేవయ్యా. ఇంతకీ ప్రచారం బాగా జరిగిందా? మన ఉపన్యాసాలెలా ఉన్నాయి? జనం ఏమనుకుంటున్నారో వాకబు చేశావా?' 

'ఎందుకు చేయనండి. అది నా బాధ్యతే కదండీ? తమరు అమాయక జనాన్ని బాగా నమ్మించారండి. మిమ్మల్ని విమర్శించినవారి పుట్టుపూర్వోత్తరాలు బయటికి లాగి విషయం ఉన్నా లేకున్నా వూదరగొట్టి ప్రజల్ని గందరగోళ పరచారండి. దోచుకుతిన్న కోట్లాది రూపాయల్ని పకడ్బందీగా వూర్ల వూర్లకీ చేరవేసి చాపకింద నీరులా పంచి పెట్టించారండి. మందు సీసాలు లోడ్లకు లోడ్లు తరలించి తెగ తాగించారండి. రకరకాల పథకాలు ప్రకటించి ప్రలోభాలకి, భ్రాంతులకి గురి చేశారండి. ఇక దొంగ ఓట్లకి, రిగ్గింగులకి, బూత్‌కాప్చరింగులకి ముందస్తు ప్రణాళికలు సిద్ధం చేశారండి. ఇన్ని చేశాక ఇక తిరుగేముంటుందండీ?' 

'అయితే గెలుస్తామంటావ్‌?' 

'సార్‌... అక్కడే చిన్న సందేహమండి. తమరు కోప్పడనంటే చెబుతాను. మీరు చేసిన ప్రసంగాలే మిమ్మల్ని ఓడిస్తాయేమోనని నా భయమండి' 

'అదేం అపశకునమయ్యా, ఏమన్నాను నేను?' 

'ఏముందండీ? తమరు ప్రజల్ని నమ్మించే ఆవేశంలో అసలు సంగతి మర్చిపోయినట్టున్నారు. ప్రతీసభలో ఒకేరకమైన పిలుపునిచ్చారండి. అదే సందేహంగా ఉందండి' 

'చంపకుండా అదేంటో సెప్పవయ్యా...' 

'అదేసార్‌! నీతిపరులకే ఓటెయ్యమని, మేలు చేసేవారినే ఎన్నుకోవాలని, నిజాయతీ నేతలకే పట్టం కట్టాలని, సచ్ఛీలురనే గెలిపించాలని... పదే పదే చెప్పారండి. మరి జనమంతా మీ మాట వినేట్టయితే, ఆ లెక్కన ఓట్లన్నీ మీకు పడవు కదండి? తమరి చరిత్రను తమరే మరిచిపోయి ఇలా పిలుపిస్తే ఎలాగండి? అదొక్కటే నా బెంగండి. వెళ్లొస్తానండి!'

PUBLISHED IN EENADU ON 07.05.2014

అసలైన చికిత్స!

డాక్టర్‌ పిచ్చేశ్వర్రావు ఆసుపత్రికి పంకజాక్షి ఆదరాబాదరా వచ్చింది. పక్కనే ఆమె భర్త అప్పారావు కోపంగా, చిరాగ్గా చూస్తూ నుంచుని ఉన్నాడు.

'డాక్టర్‌! ఈయన ఉదయం లేస్తూనే వింతగా ప్రవర్తించడం మొదలు పెట్టారండి. మీరే కాపాడాలి' అందామె కొంగును నోట్లో దోపుకొంటూ.

'ఛ... నోర్ముయ్‌! చమడాలు వలిచేస్తా' అన్నాడు అప్పారావు.

పంకజాక్షి గుడ్లనీరు కుక్కుకుని, 'పెళ్లయిన దగ్గర్నుంచి ఒక్కమాట అని ఎరగరండి. ఏది పెడితే అది నోరు మూసుకుని తినేవారు. పెళ్లయిన కొత్తలో ఈయనకసలు నోట్లో నాలుక ఉందో లేదోనని ఆయన నిద్రపోతున్నప్పుడు నోరు తెరిచి పరీక్షించాను కూడానండి. నోట్లో వేలుపెడితే కొరకరు సరికదా, చంటి పిల్లాడిలా చీకుతారండి. అలాంటి మనిషి ఇలా నానా తిట్లూ తిడుతున్నారండి. ఏదైనా పిచ్చి పట్టిందేమోనని భయమేస్తోందండి'

డాక్టర్‌ పిచ్చేశ్వర్రావు తలపంకించి అప్పారావుతో 'మిమ్మల్నోసారి పరీక్షించాలి. ఇలా కూర్చోండి' అన్నారు.

'నువ్వెవరు నన్ను పరీక్షించడానికి? వెళ్లి మీ నాన్నని పరీక్షించుకో, అమ్మని పరీక్షించుకో. నా జోలికొస్తే తాట తీస్తా' అన్నాడు అప్పారావు.

డాక్టర్‌ పిచ్చేశ్వరరావు పంకజాక్షికేసి తిరిగి, 'కొన్ని రోజులుగా మీవారు ఎక్కడెక్కడ తిరిగారో, ఏం చేశారో చెప్పగలవామ్మా?' అని అడిగారు.

'ఆయ్‌... ఎన్నికల కాలం కదండీ! కనిపించిన ప్రతి రాజకీయ నాయకుడి సభలకు పోయొచ్చేవారండి. ఏ నేత రోడ్‌ షో పెట్టినా ఈయన ఉండాల్సిందేనండి. ఇంట్లో టీవీలో కూడా అన్నీ ప్రచారం వార్తలే చూసి చూసి చంపేశారండి బాబూ...' అంది పంకజాక్షి.

డాక్టర్‌ పిచ్చేశ్వర్రావుకు విషయం అర్థమైంది.

'నువ్వేం కంగారుపడకమ్మా. నేను నయంచేస్తా కదా?' అన్నారు.

ఇంతలో అప్పారావు దిగ్గున లేచి, 'తోలు వలుస్తా! తొక్కలో కబుర్లు నువ్వూను. నాకే రోగం లేదని సవాలు చేస్తా, నువ్వు చేస్తావా? నీ మాట అబద్ధమైతే నీ స్టెతస్కోపు నాకిచ్చేయాలి. నిజమైతే నా మొలతాడు నీకిచ్చేస్తా. సవాలుకు సిద్ధమేనా?' అన్నాడు.

డాక్టర్‌ పిచ్చేశ్వర్రావు నవ్వి, 'అలాగే అప్పారావు! మీకే రోగం లేదు. ఉన్న రోగాలన్నీ మన రాష్ట్ర ప్రజలకు, నాయకులకే ఉన్నా యి. సరేనా?' అన్నారు.

'ఏం సోయి తప్పి మాట్లాడుతున్నవా? జనానికేం రోగముంటది? ఉన్న రుగ్మతలన్నీ నాయకులకే ఉంటవి. ఆల్లంతా ఆగమాగం చేస్తంటే నువ్వేం తమాషా చూస్తన్నవా?' అని భార్య కేసి తిరిగి, 'ఈడి పేరేంటి, పిచ్చేశ్వర్రావు కదూ?' అని అడిగి, మళ్ళీ డాక్టర్‌కేసి చూస్తూ, 'నేను చిటికేస్తే వెయ్యి ముక్కలవుతావు' అన్నాడు.

ఈలోగా డాక్టర్‌ సైగ చేయడంతో నర్సు వచ్చి అప్పారావును కూర్చోబెట్టింది. అప్పారావు ఆమెను చూస్తూనే చటుక్కున ఆమె బుగ్గలు నిమిరాడు. రెండు చేతుల్తో ఆమె తలవంచి నడినెత్తిన ముద్దుపెట్టుకుని, మెత్తగా నవ్వుతూ 'నర్సులారా... అమ్మలారా... అక్కలారా... రాబోయేది స్వర్ణయుగం. నేనే సీఎం అవుతా. అప్పుడు మీకందరికీ బంగారు సిరెంజీలు ఇస్తా. వాటితో పొడవడానికి ఉచితంగా రోగుల్ని సరఫరా చేస్తా. నా మీద మా ఆవిడ, ఈ డాక్టరు కుట్ర పన్నుతున్నారు. కానీ, జనమంతా నా వెనకే ఉన్నారు. బై ది బై... నువ్వు కొత్త ఆసుపత్రి కట్టుకోవడానికి భూమినిప్పిస్తా, దాని విలువలో సగం నాకిస్తావా? పోనీ నా పది రూపాయల కంపెనీ షేర్లు మూడువేలు పెట్టి కొనుక్కుంటావా?' అన్నాడు.

ఇంతలోనే డాక్టర్‌ పిచ్చేశ్వర్రావు అతడికి ఓ ఇంజెక్షన్‌ ఇచ్చారు. దాంతో అప్పారావు ఏదో మత్తులో ఉన్నట్టుగా, 'నీ నాలుక తెగ్గోస్తా... నా జోలికొస్తే ఖబడ్దార్‌... నువ్వొక రావణాసురుడివి... కంసుడివి... హిరణ్య కశిపుడివి... లోఫర్‌వి... డాఫర్‌వి... అనకొండవి... తోడేలువి... కుక్కవి... గాడిదవి... తోలు వలుస్తా... తీట తీసేస్తా... చర్మం వలిచేస్తా... గుడ్డలిప్పదీస్తా... చెప్పుతో కొడతా...' అంటూ గొణగసాగాడు.

పంకజాక్షి వెక్కి వెక్కి ఏడుస్తూ 'ఈయనకి ఏమైందండీ?' అంది.

డాక్టర్‌ పిచ్చేశ్వర్రావు 'మరేం ఫర్వాలేదమ్మా... రకరకాల రాజకీయ నాయకుల విమర్శలు, ప్రతి విమర్శలు, ఆరోపణలు, తిట్లు, శాపనార్థాలు విని విని మీవారి మనసు, బుర్ర గందరగోళానికి గురయ్యాయి. నేతలు ఇంతలా దిగజారి మాట్లాడటం, సహజంగా నెమ్మదస్తుడైన మీ వారిని కలవరపరచింది. అంతే!' అన్నారు.

'మరి ఈయనకి ఏంటండీ చికిత్స?' అంది పంకజాక్షి.

డాక్టర్‌ పిచ్చేశ్వర్రావు ఆమెను ఆగమంటూ సైగ చేసి, అప్పారావు దగ్గరకు వెళ్లి, 'అప్పారావుగారూ, ఇప్పుడెలా ఉంది?' అన్నారు.

'నాకు కాదండీ... అవినీతిపరులు, చిత్తశుద్ధి లేనివారు, ప్రజల్లో విద్వేషాలు పెంచేవాళ్లు, నేరారోపణలు ఉండీ జైలుకెళ్లినా బెయిలు మీద వచ్చి సిగ్గులేకుండా జనానికి మాయమాటలు చెప్పేవారు, ప్రజల ఆస్తులు దోచుకునేవారు, అక్రమంగా కోట్లకు కోట్లు దోచుకున్నవారు... వీళ్లందరికీ ఉందండీ మాయరోగం! వీళ్లా చెప్పండి మన అభ్యర్థులు? ముందువాళ్లకు చెయ్యండి వైద్యం...' అన్నాడు అప్పారావు నీరసంగా.

'నేను కాదు, ఇలాంటి నీచ రాజకీయ నేతలందరికీ మీరే చక్కని వైద్యం చేయగలరు' అన్నారు డాక్టర్‌.

ఆ మాటలకు అప్పారావు ఉత్సాహంగా లేచి కూర్చుని 'నేనా... ఎలా?' అన్నాడు.

'మీ ఓటు వేయడం ద్వారా. అవినీతిపరులైన అసుర నేతల్ని మీ ఓటు అనే వజ్రాయుధంతో శిక్షించండి. పనిచేసే నేతనే ఎన్నుకోండి. మీ చేతిలోని ఓటే సమాజంలోని అన్ని రోగాలకూ చికిత్స' అన్నారు.

'మనసులో దిగులంతా మాయం చేశారు డాక్టర్‌' అంటూ అప్పారావు లేచి కూర్చున్నాడు. పంకజాక్షి ఆనందంతో కళ్లు తుడుచుకుని డాక్టర్‌కి నమస్కరించింది.

PUBLISHED IN EENADU ON 30.04.2014