దెయ్యాల గ్రామం... భయాలు, నిజాలు!

దెయ్యాల గురించి వినాలంటే అందరూ రెడీ. కానీ చూడ్డానికి మాత్రం హడల్. అందుకనే చిన్న పిల్లల కథల నుంచి హాలీవుడ్ సినిమాల వరకు దెయ్యం కథలు బోలెడు. కానీ మన దేశంలో ఓ గ్రామానికి గ్రామం ‘దెయ్యాల గ్రామం’గా పేరు పొందిందని మీకు తెలుసా? దాన్ని ‘హాంటెడ్ విలేజ్ ఆఫ్ ఇండియా’గా పిలుస్తారు. ఆ గ్రామం మీద కొందరు పరిశోధకులు ఆధునిక సాంకేతిక పరికరాలతో పరిశోధన కూడా చేశారు. ఆ గ్రామంలోని కొన్ని వింతల గురించి అధికారికంగా చెప్పారు కూడా. మరి ఆ గ్రామం ఏమటో, ఎక్కడుందో తెలుసుకుందామా?

ఆ గ్రామం పేరు ‘కుల్ధారా’. రాజస్థాన్ లోని జైసల్మేర్ కు 18 కిలోమీటర్ల దూరంలో ఉంది. గ్రామమంతా పాడబడిపోయి ఉంటుంది. ఇళ్లన్నీ ఖాళీగా కనిపిస్తాయి.

ఆ గ్రామం భారత ఆర్కియలాజికల్ సొసైటీ ఆధీనంలో ఉంది. ప్రభుత్వం దాన్ని ఓ పర్యటక ప్రదేశంగా మార్చింది. అయితే రాత్రి వేళ మాత్రం ఆ గ్రామంలోకి ప్రవేశం నిషేధం. ప్రధాన ద్వారాలకు తాళాలు కూడా వేసేస్తారు. 

-     ఆ గ్రామం చరిత్ర ఏంటి?

ఈ గ్రామాన్ని 13వ శతాబ్దంలో 'పాలివాల్ బ్రాహ్మణులు' (Paliwal Brahmins) స్థాపించారు. వారు వ్యవసాయం, వ్యాపారంలో చాలా నైపుణ్యం కలిగినవారు. ఆ కాలంలో కుల్ధారా దాదాపు 84 గ్రామాలతో కూడిన చాలా సంపన్నమైన ప్రాంతం. 19వ శతాబ్దం (సుమారు 1825) ఆరంభంలో జైసల్మేర్ రాజ్యానికి 'సలీం సింగ్' అనే క్రూరమైన, అవినీతిపరుడైన దీవాన్ ఉండేవాడు. అతని కన్ను కుల్ధారా గ్రామ పెద్ద అందమైన కుమార్తెపై పడింది. ఆమెను తనకిచ్చి పెళ్లి చేయమని అడిగాడు. అయితే అప్పటికే ఆ అమ్మాయి పెళ్లి కుదరడంతో గ్రామ పెద్ద అందుకు అంగీకరించలేదు. దాంతో ఆమెను బలవంతంగా పెళ్లి చేసుకోవాలని సలీం సింగ్ నిర్ణయించుకున్నాడు. తన కోరిక తీర్చకపోతే పౌర్ణమి నాటికి గ్రామంపై దాడి చేస్తానని, భారీ పన్నులు విధిస్తానని గ్రామస్తులను సలీంసింగ్ బెదిరించాడు.

తమ కుమార్తెను, గ్రామ గౌరవాన్ని కాపాడుకోవడానికి కుల్ధారా గ్రామ ప్రజలు ఒక సభ ఏర్పాటు చేశారు. అందరూ కలిసి ఓ నిర్ణయం తీసుకున్నారు. చీకటి పడగానే, ఆ 84 గ్రామాలలోని వేలాది మంది పాలివాల్ బ్రాహ్మణులు తమ ఇళ్లను, ఆస్తులను, పశువులను వదిలిపెట్టి ఎవరికీ తెలియకుండా రాత్రికి రాత్రే మాయమయ్యారు. వారు ఎక్కడికి వెళ్లారో ఇప్పటికీ ఒక రహస్యమే.

వారు వెళ్లేముందు ఆక్రోశంతో "ఇకపై ఇక్కడ ఎవరూ స్థిరపడలేరు, ఈ గ్రామం ఎప్పటికీ పాడుబడే ఉంటుంది" అని తీవ్రమైన శాపం పెట్టారని స్థానికులు చెబుతారు.

 

-     దెయ్యాల గ్రామంగా ఎలా మారింది?

అప్పటి నుండి ఇప్పటి వరకు అక్కడ ఎవరూ నివసించలేకపోయారు. అక్కడ నివసించడానికి ప్రయత్నించిన వారు అనేక ఇబ్బందులకు గురయ్యారని,  మరణాలు ఎదుర్కొన్నారని స్థానికులు కథలు కథలుగా చెబుతుంటారు.

-     పరిశోధన ఏం చెప్పింది?

కుల్ధారా గ్రామంలో ఉన్న అదృశ్య శక్తుల గురించి తెలుసుకోవడానికి భారతదేశంలోనే అత్యంత ప్రముఖమైన పారానార్మల్ బృందం ఒక సమగ్రమైన పరిశోధన చేసింది. 2013 మే నెలలో ఢిల్లీకి చెందిన 'ఇండియన్ పారానార్మల్ సొసైటీ' (Indian Paranormal Society) కి చెందిన సుమారు 30 మంది సభ్యుల బృందం కుల్ధారా గ్రామాన్ని సందర్శించింది. ఈ బృందానికి ప్రముఖ పారానార్మల్ పరిశోధకుడు, దివంగత గౌరవ్ తివారీ (Gaurav Tiwari) నాయకత్వం వహించారు.

ఈ బృందం ప్రత్యేక అనుమతి తీసుకుని రాత్రిపూట చీకటి పడిన తర్వాత మొదలుకుని ఉదయం వరకు ఆ పాడుబడిన గ్రామంలోనే బస చేసింది.

వారు కేవలం నమ్మకాలపై ఆధారపడకుండా, శాస్త్రీయ పద్ధతిలో అత్యాధునిక పరికరాలను ఉపయోగించి పరిశోధన చేశారు. వాతావరణంలోని విద్యుదయస్కాంత క్షేత్రాల్లో వచ్చే ఆకస్మిక మార్పులను గుర్తించడానికి EMF మీటర్లు (Electromagnetic Field Meters) ఉపయోగించారు. దెయ్యాలు లేదా అదృశ్య శక్తులు ఉన్నప్పుడు ఈ తరంగాలు మారుతాయని నమ్ముతారు. అలాగే సాధారణంగా మనుషులు వినలేని అతి సూక్ష్మమైన శబ్దాలను వినడానికి EVP రికార్డర్లు (Electronic Voice Phenomenon Recorders) సాయంతో శబ్దాలను రికార్డు చేశారు.  

ఇంకా పరిసరాల ఉష్ణోగ్రతల్లో అకస్మాత్తుగా వచ్చే హెచ్చుతగ్గులను కొలవడానికి  లేజర్ థర్మామీటర్లు (Laser Thermometers) వాడారు.  అలాగే కంటికి కనిపించని కదలికలను, నీడలను చీకట్లో కూడా రికార్డు చేయగలిగే ‘మోషన్ సెన్సార్లు, నైట్ విజన్ కెమెరాలు’ తీసుకొచ్చి గ్రామంలో అమర్చారు.  

-     పరిశోధనలో ఏమి గమనించారు?

ఆ రాత్రి వారు గ్రామంలో గడిపిన సమయంలో అనేక భయానక, వింతైన సంఘటనలను నమోదు చేశారు.

·         ఉష్ణోగ్రతలో మార్పులు: చుట్టుపక్కల వాతావరణం వేడిగా ఉన్నప్పటికీ, గ్రామంలోని కొన్ని పాడుబడిన ఇళ్ల దగ్గర ఉష్ణోగ్రత అకస్మాత్తుగా పడిపోయి చాలా చలిగా అనిపించినట్లు మీటర్లలో రికార్డ్ అయింది.

·         వింత శబ్దాలు, గుసగుసలు: వారి EVP రికార్డర్లలో ఎవరో గుసగుసలాడుతున్నట్లు, అస్పష్టమైన గొంతులు, ముఖ్యంగా పిల్లలు ఏడుస్తున్నట్లు, మాట్లాడుకుంటున్నట్లు శబ్దాలు రికార్డ్ అయ్యాయి.

·         నీడలు కదలడం: నైట్ విజన్ కెమెరాలలో కొన్ని ఇళ్ల గోడల వెనుక, వీధుల్లో చీకటి ఆకారాలు (Shadow entities) కదులుతున్నట్లు వారు స్పష్టంగా గమనించారు.

·         భౌతిక స్పర్శ: బృందంలోని కొందరు సభ్యులు తమ భుజాలపై ఎవరో చెయ్యి వేసినట్లు, తమను ఎవరో తాకినట్లు అనుభూతి చెందారు.

·         వాహనాలపై గుర్తులు: అత్యంత ఆశ్చర్యకరమైన విషయం ఏమిటంటే, మరుసటి రోజు ఉదయం వారు గ్రామం బయట పార్క్ చేసిన తమ కార్ల అద్దాలపై పిల్లల చేతి ముద్రలు, గీతలు ఉండటాన్ని గమనించారు.

ఈ పరిశోధనలన్నింటి ఆధారంగా, కుల్ధారా గ్రామంలో కేవలం మూఢనమ్మకాలు మాత్రమే కాదని, అక్కడ కచ్చితంగా కొన్ని ప్రతికూల శక్తులు (Negative or Paranormal energies) సంచరిస్తున్నాయని ఇండియన్ పారానార్మల్ సొసైటీ అధికారికంగా నిర్ధారించింది.

 

- ప్రస్తుత పరిస్థితి...

ప్రస్తుతం కుల్ధారా గ్రామాన్ని ఆర్కియాలజికల్ సర్వే ఆఫ్ ఇండియా (ASI) ఒక పర్యాటక ప్రదేశంగా అభివృద్ధి చేసింది. పగటిపూట పర్యాటకులు ఈ పాడుబడిన ఇళ్లను, వీధులను మరియు శిథిలమైన దేవాలయాన్ని సందర్శించవచ్చు. అయితే, భద్రతా కారణాల దృష్ట్యా సూర్యాస్తమయం తర్వాత ఇక్కడికి వెళ్లడానికి ఎవరికీ అనుమతి లేదు. ప్రధాన ద్వారాలకు తాళాలు వేస్తారు.